په‌رله‌مانتارێكی پارتی هۆكاری خه‌رج نه‌كردنی بودجه‌ی دژه‌ تیرۆری یه‌كێتی ئاشكرا ده‌كات
  2022-12-02       490       

ئەندامێكی فراكسیۆنی پارتی دیموكراتی كوردستان لە پەرلەمانی كوردستان، نووسینێكی بە ناونیشانی (تا کەی خەڵکی سلێمانی سووکایەتییەکانی بافڵ تاڵەبانی قەبووڵ دەکەن؟) بڵاو كردەوە و هۆكاری خه‌رج نه‌كردنی بودجه‌ی دژه‌ تیرۆری یه‌كێتی ئاشكرا ده‌كات.

ئاوێنه‌: شوان زراری، پەرلەمانتاری پارتی لە نووسینەكەیدا رای گەیاندووە، لە دوای تیرۆرکردنی عەقید هاوکار جاف کە زۆر بە ئاشکرا و ڕوونی بۆ هەموو خەڵکی کوردستان ئاشکرابوو و لە دان پێدانانەكان بە روونی دەرکەوت کە لە لایەن دەست و پێوەندەکانی بافڵ تاڵەبانی تیرۆرکراوە، بەتایبەتی کە وەهاب هەڵەبجەیی، بەرپرسی دژە تیرۆری سلێمانی، ڕاستەوخۆ سەرپەرشتیی تیرۆرکردنی عەقید هاوکاری کردووە، ”بافل تاڵەبانی و بەرپرسانی دیکەی یەکێتی، دەستیان بە هەڵمەتێکی چەواشەکارانە کردووە بۆ پەردەپۆشکردن و لە بیربردنەوەی ئەو تاوانە تیرۆریستییە گەورەیەی لە هەولێر لە پێش چاوی ژن و منداڵی هاوکار جاف و هەموو خەڵکی کوردستان ئەنجامیان دا.“

ڕوونیشی كردۆتەوە، بافل تاڵەبانی لە جیاتی ئەوەی هاوکاریی دەسەڵاتی دادوەری بکات و بکەران و تۆمەتبارانی ئەم کەیسە کە خۆی داڵدەی داون، ڕادەستی دادگا بکات، كەچی ”بیانووی بێ مانا و بێسەروبەر بۆ ئەم تیرۆرە دەهێنێتەوە. بافڵ و یەکێتی تا ئەو کاتەی دەزگا ئەمنییەکان، تاوانی تیرۆرکردنی عەقید هاوکار جافیان ئاشکرا نەکردبوو، کێشەيان نەبوو. بەڵام دوای ئەوەی دەستیان کەشف بوو، بافل بۆ پەردەپۆشکردنی تاوانەکە، دەستی بە بوختان و تێکەڵکردنی بابەتەکان کرد تا بە خەیاڵی خاوی خۆی، تاوانەکە لەبەر چاوی خەڵک ون بکات.“

شوان زراری راشكاوانە دەڵێت: ”بەداخەوە دەزگای دژە تیرۆری یەکێتی، بووەتە دەزگای تیرۆرکردنی خەڵک و لە ماوەی ساڵی ڕابردوودا دەیان تاوانی تیرۆرکردنیان لە سنووری سلێمانی و گەرمیان و پشدەر ئەنجام داوە، کە دیارترینیان تیرۆرکردنی موراد کانی کوردەیی و هاوکارەکانی بوو، هەر بۆیەش ئەنجوومەنی ئاسایشی هەرێمی کوردستان بڕیاری دا بودجە بۆ دەزگایەک کە کاری تیرۆریستی ئەنجام بدات، خەرج نەکات و بابەتەکەش  سیاسی نییە، بەڵکوو یاساییە.“

باسیشی لەوە كردووە: ”لای هەموو خەڵکی سلێمانی و کوردستان ئاشکرایە کە گەندەڵی و دزینی سامان و داهاتی سلێمانی و سەرانەسەندن لە بازرگانان و هاوردەکردنی شتی ئیکسپایەر و ماوەبەسەرچوو لە لایەن مافیاکانی بافڵ بەردەوامە، چونکە 

ئه‌و ده‌ڵێت: بافڵ خەریکی پیلاندانان و فرۆشتنی سلێمانییە و باکی بە هەڵگیرساندنی تەنانەت شەڕی ناوخۆش نییە و هەموو هەوڵەکانی لە پێناو بەزۆر سەپاندنی حوکمڕانیی مافیایی خۆیەتی، پرسیارەکە لێرەدا ئەوەیە تا کەی خەڵکی سلێمانی ئەم سووکایەتییەی کە بافڵ پێیان دەکات، قەبووڵ دەکەن؟ چونکە هۆکاری خراپبوونی دۆخی ئابووریی سلێمانی، بافڵ خۆیەتی کە ڕێگری لە پرۆسەی چاکسازی دەکات بۆ ئەوەی خۆی دەست بە سەر هەموو شتێکدا بگرێت، بەڵام خەڵکی کوردستان دەبێت دڵنیا بن کە چاکسازی و هەوڵی بە سزا گەیاندنی تاوانباران و تیرۆریستان بەردەوام دەبێت.“

هەروەها ئەوەشی ئاشكرا كردووە، بافڵ تاڵەبانی لە درێژەی کارە مافیاییەکانی، هەوڵی ئەوەی داوە بە نایاسایی لە پرۆسەی بەرهەمهێنانی غاز پارەی دەست بکەوێت، بە بێ ئەوەی وەبەرهێنان بکەن، بەڵام کە ڕێگەیان پێ نەدراوە ئەوە بکەن، هەوڵی پەکخستنی پرۆسەکە دەدەن.

لە كۆتاییشدا شوان زراری دەڵێ: ”کەسێکی رفتار نەخۆش کە باری دەروونیی شڵەژاوە، پێویستە  چارەسەری حاڵی پەرێشان و شێواوی خۆیان بکات، نەک بڕیار بە دەست بێت و خەڵکی بێ تاوان، باجی هەڵە و تاوانەکانی ئەم نەخۆشە بدەن.“

 

زۆرترین بینراو
© 2023 Awene Online, Inc. All Rights Reserved.
×