قوباد تاڵەبانی، جێگری سەرۆكی وەزیرانی هەرێم رایگەیاند، : نابێ ناکۆکییە سیاسییەکان کاریگەرییان لەسەر هەنگاوەکانی چاکسازی هەبێت، دەشڵێت، پێویستە هەڵبژاردنی پەرلەمانی كوردستان زیاتر دوانەكەوێت، بەڵام گرنگیشە بەربەستەكانی بەردەم ئەنجامدانی هەڵبژاردنێكی پاك و بێگەرد چارەسەربكرێن.

ئاوێنە: بەپێی راگەیەندراویكی نوسینگەكەی، ئەمڕۆ پێنجشەممە، قوباد تاڵەبانی، جێگری سەرۆک وەزیرانی هەرێم لە هەولێر پیشوزای كردوە لە کلاوس شتڕایشەر، کۆنسوڵی گشتی ئەڵمانیا لە هەرێم.

بەگوێرەی راگەیەندراوەكە، لە کۆبونەوەکەدا تاوتوێی دۆخی سیاسیی ناوخۆی هەرێم کراو قوباد تاڵەبانی ئاماژەی بەوەدا کە، "پێویستە ناکۆکییەکان چارەسەر بکرێن بۆ ئەوەی پێگەی هەرێم بەهێز بێت لەئاست ئاڵنگارییەکان."

وەك لە راگەیەندراوەكەدا هاتوە، لە بەشێکی دیکەی کۆبونەوەکەدا، باس لە پەیوەندییەکانی نێوان هەولێرو بەغدا کراو قوباد تاڵەبانی رایگەیاند، "بژاردەی یەکەم و کۆتاییمان رێککەوتنێکی گشتیگیرو درێژخایەنە، ئەمەش لە بەرژەوەندی هەمو هاوڵاتیانی عێراق و کوردستاندایە."

راگەیەندراوەكە ئاماژەی بەوەداوە كە "پرۆسەی ریفۆرم، بەتایبەت چاکسازی لە هێزەکانی پێشمەرگە تەوەرێکیتری کۆبونەوەکە بو و  قوباد تاڵەبانی وێڕای باسکردنی چۆنییەتی بەرەوپێشچوونی هەنگاوەکانی چاکسازی، رایگەیاند، نابێت رێگە بدرێت ناکۆکییە سیاسییەکان کاریگەرییان لەسەر هەنگاوەکانی چاکسازی ببێت."

هەر لەبارەی دۆخی هەرێمەوە، قوباد تاڵەبانی ئاماژەی بەوەدا "پێویستە هەڵبژاردن بکرێت و زیاتر دوانەکەوێت، لەگەڵ ئەوەش گرنگە پێشتر گرفت و بەربەستەکانی بەردەم ئەنجامدانی هەڵبژاردنێکی پاک و بێگەرد چارەسەر بکرێن بۆ ئەوەی متمانەی هاوڵاتیان بە هەڵبژاردن بەرز ببێتەوە."