محەممەد شیاع سوودانی، سەرۆک وەزیرانی عێراق گەیشتە سلێمانی و بەشداریی لە "دیداریی سلێمانی" دەکات.
ئاوێنە: ئەمڕۆ چوارشەممە 15ـی 3ـی 2023، سەرۆک وەزیرانی عیراق بە مەبەستی بەشداریکردن لە دیداری سلێمانی، گەیشتە سلێمانی.
بڕیارە دیدارەکە دوو رۆژ بخایێنێت و هەریەک لە نێچیرڤان بارزانی، سەرۆکی هەرێمی کوردستان و محەممەد شیاع سوودانی، سەرۆک وەزیرانی عێراق و چەندین بەرپرسی دیکەی حکومی و حزبی لەسەر ئاستی هەرێمی کوردستان و عێراق بەشداریی دەکەن.
لە دیدارەکەدا چەندین بیرمەند و کەسایەتی و شارەزا و سەرکردە خاوەن بڕیارەکان لەسەر ئاستی هەرێم و عێراق و رۆژهەڵاتی ناوەڕاست و ئەمریکا بەشدار دەبن و لەبارەی دیارترین کێشەکان لەژێر ناونیشانی، "پاش 20 ساڵ؛ دۆخى عێراق لە نێوەندى ئاڵنگارییە جیهانییە نوێییەکاندا" گفتوگۆدەکەن.
دیداری سلێمانی لە ساڵی 2013ـەوە رێک دەخرێت و تێیدا چەندان سیاسی و خاوەن بڕیار لەسەر ئاستی جیهان بۆ گفتوگۆکردن کۆدەبنەوە.
بەشێک لەو پرسانەی لە پانێلەکەدا باسی لێوەدەکرێت باس لە 20 ساڵ گۆڕانی سیاسی عێراق و دەستوور و پرسەکانی نەوت و گۆڕانی کەشوهەوا و ئابووری عێراق دەبێت.