تەندروستی سلێمانی رایگەیاند: ئەمڕۆ چوارشەممە، 10 توشبوی دیكەی كۆرۆنا گیانیان لەدەستداوەو دەشڵێت: ژمارەی ئەو توشبوانەی پێویستیان بە نەخۆشخانەیە لەهەڵکشاندایە.

ئاوێنە: بەپێی ئاماری رۆژانەی كۆرۆنا كە كەمێك لەمەوبەر لەلایەن د. یاد نەقشبەندی، وتەبێژی بەڕێوەبەرایەتی گشتی تەندروستی سلێمانییەوە بڵاوكراوەتەوە، ئەمڕۆ، 40 توشبوی كۆرۆنا داخڵی نەخۆشخانەكانی تایبەت بە كۆرۆنا لە شارەكە كراون.

هەر بەگوێرەی ئامارەكە ئەمڕۆ، 29 توشبوی كۆرۆنا نەخۆشخانەكانیان جێهێشتوەو 10 توشبوش گیانیان لەدەستداوە.

ئامارەكە ئەوەی خستۆتەڕو كە لە ئێستادا 194 توشبوی كۆرۆنا لە نەخۆشخانەكانی سلێمانی ماون.

د. یاد نەقشبەندی وتویەتی"داواکارم لە هاوڵاتیانی خۆشەویست زیاتر پابەندی ڕێنماییە تەندروستیەکان بن، چونکە لە ئێستادا ژمارەی ئەو توشبوانەی پێویستیان بە نەخۆشخانەیە لە هەڵکشاندایە."

هەر بەگوێرەی ئامارەكە تا ئێستا كۆی گشتی ئەوانەی پلازمایان بەخشیوە لەدوای چاكبونەوەیان لە نەخۆشییەكە، گەیشتۆتە 983 بەخشەر.