پەرلەمانتارێكی كورد لە پەرلەمانی عێراق ئاشكرایدەكات كە وەزیری بازرگانی عێراق بەڵێنیداوە هەفتەی داهاتو نیوەی پارەی گەنمی جوتیارانی هەرێمی كوردستان بۆ ساڵانی رابردو، خەرج بكرێت.
ئاوێنە: نوسینگەی راگەیاندنی موسەننا ئەمین، پەرلەمانتار لە هاوپەیمانی هیوای كوردستان، ئەمڕۆ پێنجشەممە لە راگەیەندراوێكدا وتی، دوای ئەوەی دو ڕۆژ بەرلە ئێستا لەکۆبونەوەی هاوپەیمانی هیوا لەگەڵ سەرۆک کۆماری عێراق، موسەننا ئەمین داوای کرد کە سەرۆک کۆمار ڕۆڵی هەبێت لە پرسی مافی جوتیاراندا، ئەمڕۆ بەحزوری سەرۆک کۆمارو وەزیری بازرگانی عێراق و موسەننا ئەمین و غالب محەمەد، نوێنەرانی هاوپەیمانییەکە، وەزیری بازرگانی بەڵێنی خەرجكردنی پارەكەی داوە.
بەپێی راگەیەندراوەكە، وەزیری بازرگانی بەڵێنیداوە لەهەفتەی داهاتودا نیوەی مافی جوتیارانی هەرێمی کوردستان بۆ ساڵانی 2014و 2015و 2016 بدرێت و نیوەکەیتریش بەزوترین کات چارەسەر بکرێت.