لە میانەی بەشداریکردنی لە نمایشێک لە کۆشکی مانگیۆنگدای بۆ منداڵانی خوێندنگەکان لە شاری پیۆنگیانگ، سەرۆکی کۆریای باکوور داوایکرد ناوەڕۆکی سیستمی پەروەردەی وڵاتەکەی و شێوازەکانی خوێندن نوێبکرێتەوە.
راگەیاندنی رەسمی وڵاتەکەی رایگەیاند، “کیم جۆنگ ئون، سەرۆکی کۆریای باکوور لە میانەی بەشداری لە نمایشێکی خوێندکارەکاندا داوای کردووە ناوەڕۆک و شێوازەکانی سیستمی پەروەردە نوێبکرێتەوە، بۆ ئەوەی دڵنیابێت لەوەی کە منداڵان زانیاری پراکتیکی بۆ بنیاتنانی کۆمەڵگایەکی تەندروست بەدەستدەهێنن”.
راگەیاندنی ئەو وڵاتە جەختی لە گرنگی نەوەی داهاتوو کردووەتەوە و ئاماژەی بەوە کردووە، “نمایشەکە دەرخەری دڵسۆزی بەهێزی منداڵانی خوێندنگەکانە بۆ ئەوەی خۆیان ئامادە بکەن ببنە شۆڕشگێڕ و نیشتمانپەروەر و پشتیوانی وڵاتێکی بەهێز بکەن”.
سیستمی پەروەردە لە کۆریای باکوور گشتگیر و خۆڕاییە، هەروەها لەلایەن حکومەتەوە پارەی خوێندنگەکان دابیندەکرێت و منداڵان ساڵێک لە باخچەی ساوایان، چوار ساڵ خوێندنی سەرەتایی، شەش ساڵیش خوێندنی ناوەندی دەخوێنن و دواتر دەچنە زانکۆکان.