سەرۆک وەزیرانی عێراق ڕایگەیاند، بەپێی ئەو پلانەی دانراوە لە ماوەی سێ بۆ پێنج ساڵی داهاتوودا، عێراق دەگاتە ئاستی خۆبژێوی لە بەرهەمهێنانی گاز و ئەو تێچووەی بۆ هاوردەکردنی گاز تەرخان دەکرێت، بۆ پرۆژەی دیکە تەرخانی دەکەن.
ئەمڕۆ محەممەد شیاع سوودانی، سەرۆکوەزیرانی عێراق ڕایگەیاند، هیچ کێشەیەک لە بەرهەمهێنان و هەناردەی نەوتی عێراقدا نییە و ڕووداوەکان لە عێراقدا بەردەوامن، سەرەڕای ئەوەش عێراق ڕێژەی لە ٣٠٪ وزەی جیهان دابین دەکات.
ئاماژەی بەوەش کرد، چوار ملیار دۆلار لەپێناو هاوردەکردنی گازدا تەرخانکراوە، کە بەشێکی زۆری بۆ بەرهەمهێنانی کارەبایە و هەر کاتێک بەرهەمهێنانی گازی ناوخۆیی گەیشتە قۆناغی خۆبژێوی، ئەم پارەیە بۆ پرۆژەکانی تر تەرخان دەکرێت.
ئەوەشی خستە ڕوو، پلانیان هەیە لە ماوەی سێ بۆ پێنج ساڵی داهاتوودا، عێراق خۆی پێداویستی گاز دابین بکات و بگاتە قۆناغێک کە چیتر بەفیڕۆدانی گاز نەمێنێت.
سەبارەت بە دەستپێکردنەوەی هەناردەی نەوتی هەرێم باسی لەوە کرد، چارەسەرکردنی کێشەکان و دەستپێکردنەوەی هەناردەی نەوتی هەرێم لەسەر کێشەکانی نێوان هەرێم و بەغدا لەسەر تێچووی دەرهێنانی نەوت و کێشەی کۆمپانیاکانی بەرهەمهێنانی نەوت لە هەرێم وەستاوە و لەگەڵ تورکیا هیچ کێشەیەکیان لەسەر ئەو بابەتە نییە.