جێگرى راوێژکاریى ئاسایشى نیشتیمانى ئەمریکا رایگەیاند، ئەو هێرشەى درەنگانى شەوى شەممە کرایە سەر هێزەکانى ئەمریکا مەترسیداربوون و بە مووشەکى دوورمەودا کراون،  دەشڵێت" ئەمریکا وەڵامى بۆ هێرشەکان دەبێت".

جۆن فاینەر، جێگرى راوێژکاریى ئاسایشى نیشتمانى ئەمریکا، لە دیمانەیەکدا لەگەڵ میدیاى ئەمریکى رایگەیاند، دوایین هێرشى گرووپە چەکدارەکان بۆ سەر هێزەکانى وڵاتەکەى جێگەى مەترسى بووەو بەمووشەکى دوورمەودا کراون.

فاینەر، وتى  وەڵامیان دەبێت بۆ ئەوانەى هێرشەکانیان ئەنجامداوە.

سوپاى ئەمریکا پێشتر رایگەیاندبوو، درەنگانى شەوى شەممە لەلایەن گرووپە چەکدارەکانى "نزیک لەئێران" بە مووشەکى دوورمەودا هێرشکراوەتە سەر بنکەى سەربازى عەین ئەسەد و سیستمى بەرگرى ئاسمانى بەشێکى زۆرى مووشەکەکانى پوچەڵکردوەتەوە.

شەوی شەممە، گرووپی مقاوەمەی ئیسلامی لە عێراق رایگەیاند، ژمارەیەک مووشەکیان ئاڕاستەی بنکەی ئاسمانیی عەین ئەسەد لە پارێزگای ئەنبار کردووە کە راوێژکارانی سەربازیی ئەمریکی تێدا جێگیرکراون.

لای خۆیەوە وتەبێژی فەرماندەی گشتی ھێزە چەکدارەکانی عێراق، لیوا یەحیا ڕەسوڵ رایگەیاند "ژمارەیەک مووشەک لە نزیک بارەگایەکی سوپای عێراق لە بنکەی عەین ئەسەد لە پارێزگای ئەنبار کەوتووەتەخوارەوە و بەھۆیەوە سەربازێک بریندار بووە".

بەگوێرەى ئامارەکانى وەزارەتى بەرگریى ئەمریکا – پنتاگۆن، لە 17ـی ئۆکتۆبەرەوە تاوەکو ئێستا زیاتر لە 100 هێرش لە دژی هێزەکانى وڵاتەکەیان، لە عێراق و سووریا تۆمارکراون.

نزیکەی دوو هەزار و 500 سەربازی ئەمریکی لە عێراق و نزیکەی 900 سەربازی ئەمریکیش لە سووریا جێگیرکراون، ئەمەش لەچوارچێوەی هەوڵەکانی واشنتن بۆ رێگرییکردن لە گەڕانەوەی داعش ئەژماردەکرێت.