سەرۆكایەتی پەرلەمانی عێراق ئیدانەی هێرشی شەوی ڕابردووی ئەمریكای بۆ سەر بارەگاى هێزە ئەمنییەكان لە بابل و ئەنبار كرد، داوای لە حكومەت کرد، هەنگاوەكانی خێراتر بكات، بە مەبەستى جێبەجێكردنی بڕیارەكەی پەرلەمان لەبارەى دوورخستنەوەی تەواوەتی هێزە بیانییەكان .
سەرۆكایەتی پەرلەمانی عێراق لە بارەی هێرشی شەوی ڕابردووی ئەمریكا بۆ سەر چەند بنكەیەكی حەشدی شەعبی لە بابل و ئەنبار ڕاگەیاندراوێكی بڵاوكردەوە.
لە ڕاگەیاندراوەكەدا هاتووە، ئیدانەی هێرشی شەوی ڕابردووی ئەمریكا بۆ سەر بارەگا ئەمنییەكان لە بابل و ئەنبار دەكەین، ئەمە پێشێلكاریی ئاشكرای سەر سەروەریی عێراقە، هەروەها ڕێزنەگرتنە لە میساق و ڕێككەوتنە نێودەوڵەتی و دووقۆڵییەكان لەلایەن ئەمریكاوە.
ئاماژە بەوەش كراوە، داوا لە حكومەتی عێراق دەكەین، هەنگاوەكانی خێراتر بكات، بۆ جێبەجێكردنی بڕیارەكەی پەرلەمان بە مەبەستی دوورخستنەوەی تەواوەتی هێزە بیانییەكان لە وڵاتەکەمان، كە بوونیان هەڕەشەیە لەسەر ئاسایش و سەقامگیری عێراق و سەلامەتی گەلەكەی .
ئەوەشخراوەتەڕوو، ئەم هێرشەی ئەمریكا پێشێلكارییەكی ڕوونە بۆ سەر یاسا و ئیرادەی گەلەكەمان و سەروەری عێراق و خوێنی گەلەكەمان هێڵی سوورە، ناتوانرێت ڕێگە بە پێشێلكردنی بدرێت.
ئەمە لەكاتێكدایە، درەنگانی شەوی ڕابردوو هێزەكانی ئەمریكا بارەگای هێزەكانی حەشدی شەعبی لە قائیمی سەر بە پارێزگای ئەنبار و جورف سەخاری سەر بە پارێزگای بابل بۆردوومان كرد، لە ئەنجامدا چەند چەكدارێكی ئەو گرووپە كوژران و برینداربوون.