عەلی عەلاق، پارێزگاری بانكی ناوەندیی عێراق رەتیدەكاتەوە جگە لە بانكی هودا، بانكی دیكەی عێراقی لەلایەن وەزارەتی گەنجینەی ئەمریكاوە سزادرابن و دەشڵێت، جیاوازی هەیە لەنێوان ئەوەی بانكێك سزابدرێت لەگەڵ ئەوەی بێبەش بكرێت لە دۆلار. دەشڵێت، بڕیاردراوە كە ژمارەیەك لە بانك و كۆمپانیا بێبەش بكرێن لە دۆلار، ئەوەش بەهۆی پابەندنەبونیان بە رێكارە نێوخۆیی و نێودەوڵەتییەكانەوە لە پەیوەست بە روبەڕوبونەوەی سپیكردنەوەی پارەو پارەداركردنی تیرۆر.
ئاوێنە: عەلی عەلاق لە چاوپێكەوتنێكدا لەگەڵ ئاژانسی هەواڵی عێراق وتویەتی، جیاوازییەكی زۆر گەورە هەیە لەنێوان ئەوەی بانكێك بخرێتە لیستی سزاكانی نوسینگەی چاودێریی ئسوڵی بیانی(OFAC) لەگەڵ بێبەشكردنی بانكێك لە مامەڵەكردن بە دۆلار كە ئەمەی دوەمیان سزا نییە، هێندەی هاندانی بانكەكەیە بۆ پابەندبون بە رێكارە نێوخۆیی و نێودەوڵەتییەكان لە پەیوەست بە روبەڕوبونەوەی سپیكردنەوەی پارەو پارەداركردنی تیرۆر.
جەختیشی كردۆتەوە، ئەو قسانەی لەبارەی دەرچونی بڕیار لەلایەن وەزارەتی گەنجینەی ئەمریكاوە بۆ سزادانی ژمارەیەك بانكی دیكەی عێراقی دەكرێن، "ورد نین"، ئەو بڕیارەی لەم دواییانە دەركراوە تاوەكو ئێستا پەیوەستە بە بانكی هوداو سەرۆكی ئەنجومەنی كارگێڕی بانكەكەوە.
هێمای بۆ ئەوەش كردوە، ئەوەی لەبارەی چەند بانكێكی دیكەوە دەوترێت، ئەوەیە كە بانكی ناوەندی بە رێنامیی بەردەوام هەڵدەستێت بە بێبەشكردنی هەندێك بانك لە دۆلار لەبەر چەند هۆكارێك كە پەیوەستن بە روبەڕوبونەوەی سپیكردنەوەی پارەو پارەداركردنی تیرۆر.
جەختیشی كردۆتەوە، چەند بڕیارێك دەركراون بۆ بێبەشكردنی ژمارەیەك بانك و دەیان كۆمپانیای ئاڵوگۆڕی دراو بۆ بێبەشكردنیان لە گەیشتن بە دۆلار، ئەوەش دوای تۆماركردنی تێبینی لەسەر ئەو بانك و كۆمپانیایانە.