ئەنجوومەنی نوێنەرانی عێراق بە زۆرینەی دەنگ بڕیاریدا، یەک ملیۆن دینار لە مووچەی ئەندامە نەهاتووەکان بۆ هەر دانیشتنێک ببڕێت .
ئەمڕۆ 1ی شوباتی 2024، لە دانیشتنی ئەنجوومەنی نوێنەرانی عێراق و لەسەر پێشنیازی محەمەد مەندەلاوی، سەرۆکی ئەنجوومەنەکە بە وەکالەت، بڕیاردرا لەمەودوا هەر ئەندامێکى ئەنجوومەنەکە لە دانیشتنەکاندا ئامادەنەبێت، سزا دەدرێت و بڕی یەک ملیۆن دینار لە مووچەکەی دەبڕدرێت.
بە گوێرەی بەیاننامەکەی ئەنجوومەنی نوێنەرانی عێراق، بڕیارەکە لە دانیشتنی داهاتووی ئەنجوومەنەکەوە جێبەجێدەکرێت.
ئەمڕۆ پێنجشەممە، ئەنجوومەنی نوێنەرانی عێراق دانیشتنێکى ئاسایی ئەنجامدا و تیایدا جگە لەو بڕیارە، خوێندنەوەی یەکەم بۆ چەند پرۆژەیاسایەک کرا.