پێگەی لیوایەكی حەشدی شەعبی لە سنوری پارێزگای ئەنبار كە شەوی رابردو لەلایەن ئەمریكاوە بۆردومان كرا
باسم عەوادی، وتەبێژی حكومەتی عێراق رەتیدەكاتەوە هیچ هەماهەنگییەكی پێشوەخت هەبوبێت بۆ هێرشەكانی شەوی رابردوی ئەمریكا. دەشڵێت، لە هێرشەكاندا 16 كەس كوژراون كە لەنێویاندا هاوڵاتی مەدەنی هەن.
ئاوێنە: باسم عەوادی، وتەبێژی حكومەتی عێراق، ئەمڕۆ شەممە، لە راگەیەندراوێكدا وتی، ئیدارەی ئەمریكا دەستدرێژییەكی نوێی بۆ سەر سەروەریی عێراق ئەنجامدا بە بۆردومانكردنی چەند پێگەیەكی هێزە ئەمنییەكانمان بە فڕۆكەی جەنگی لەناوچەكانی عەكاشات و قائم و چەند شوێنێكی مەدەنی نزیك لەو پێگانە.
ئەوەشی خستۆتەڕو، ئەم دەستدرێژییە ئاشكرایە، بوە مایەی كوژرانی 16 كەس كە لەنێویاندا هاوڵاتی مەدەنی هەن لەگەڵ برینداربونی 25 كەسی دیكەو هەروەها زیانیش بە چەند بینایەكی نیشتەجێبون و ماڵ و موڵكی هاوڵاتیان گەیشتوە.
وتوشیەتی، لەدوای هێرشەكە لایەنی ئەمریكی بە راگەیاندنی ئەوەی كە هەماهەنگی پێشوەخت هەبوە بۆ ئەنجامدانی ئەم دەستدرێژییە، پەنای بردە بەر شێواندن و تێكدانی راستییەكان، كە ئەوەش بانگەشەیەكی درۆیە بە ئامانجی چەواشەكردنی رایگشتی نێودەوڵەتی و دەرچون لەژێر باری بەرپرسیارێتی یاسایی بۆ ئەم تاوانە رەتكراوەیە بەگوێرەی تەواوی یاسا نێودەوڵەتییەكان.
وتەبێژی حكومەتی عێراق جەختی كردۆتەوە، ئەو هێرشە ئاسایشی عێراق و ناوچەكە بەرەو لێوای هەڵدێر دەبات و پێچەوانەی هەوڵەكانیشە بۆ پتەوكردنی سەقامگیری خوازراو.
عەوادی دوپاتیكردۆتەوە كە عێراق رەتیدەكاتەوە ببێتە گۆڕەپانی پاكتاوی حساباتەكان و دەبێت سەرجەم لایەنەكان ئەمە بزانن كە خاك و سەروەریی عێراق شوێنێكی لەبار نییە بۆ ناردنی پەیام و نمایشی هێزە ناكۆكەكان.
هەروەك جەختیشی كردۆتەوە كە بونی هێزەكانی هاوپەیمانی نێودەوڵەتی كە لەو ئەركاناەی پێی سپێردراون دەرچوە، بۆتە هۆكارێكی بۆ هەڕەشە لەسەر ئاسایش و سەقامگیری عێراق و پاساوێك بۆ تێوەگلاندنی عێراق لە ناكۆكییە ناوچەیی و نێودەوڵەتییەكان.
ئاماژەی بەوەشداوە، حكومەتی عێراق هەمو هەوڵێك دەدات بۆ پاراستنی خاك و شارو گیانی رۆڵەكانی لە ریزی تەواوی هێزە چەكدارەكاندا.