فەرماندەیی بڕیارگەی ناوەندی نەپەگە "مزگێنی نەورۆز"ی ئاشکراکرد و رایگه‌یاند، سیستمی موشەکی پێویست بۆ خستنه‌خواره‌وه‌ی فڕۆكه بێفڕۆكه‌وانه‌كانی توركیای دۆزیوه‌ته‌وه و تائێستا 15 فڕۆكه‌ی بێفڕۆكه‌وانی خستوه‌ته خواره‌وه.
ئاوێنە: فەرماندەیی بڕیارگەی ناوەندی پاراستنی گەل (نەپەگە) ئه‌مڕۆ چوارشه‌ممه له راگه‌یه‌ندراوێكدا باسی له‌وه‌كردوه، "بە بەهارێکی نوێوە پیرۆزبایی لە نەورۆز جەژنی ئازادی گەلەکەمان دەکەین، جەژنی نەورۆز لە هەموان پیرۆز دەکەین، دەزانرێت کە سوپای تورکیا چەندین ساڵە لە هەمو ئاستێکدا هێرش دەکات و بە پشتیوانی سیاسی، سەربازی و تەکنەلۆژیایی کە لە هێزە هەرێمی و نێونەتەوەییەکان وەریدەگرێت، هەوڵ دەدات بە سەر تێکۆشانی ئێمە زاڵ بێت".
ئاماژه‌ی به‌وه‌شكردوه، له‌م شه‌ڕانه‌ی دواییدا سوپای توركیا زیاتر پشتی به فڕۆكه‌ی بێفڕۆكه‌وان ده‌به‌ست، کە "بە پشتیوانی هەندێک هێزی نێونەتەوەیی توانیبوی دروستی بکات و هێرشی کردە سەر گەریلاکان و خەڵک، بڕوایوابو کە بەو چەکە کە نوێترین تەکنەلۆژیای سەردەمە دەتوانێت بگاتە ئەنجام، بە تایبەتی لە باشوری کوردستان و رۆژئاڤای كوردستان لە زۆر ناوچە جیاجیاكان لە دژی خەڵکە بێتاوانەکەمان بە دەیان هێرشی ئەنجامدا، بە سەدان مرۆڤی ئێمەی تیرۆر کرد".
نەپەگە ده‌ڵێت، "سەرباری هەمو هەوڵەکانی توركیا بۆ گۆشەگیرکردنی گەلەکەمان لە ئاستی نێونەتەوەیی، گەلی کورد سیستمی موشەکی پێویست بۆ ئەم شەڕەی دۆزییەوە و گەیشتە ئەو ئاستەی دەوڵەتی تورکیا بخاتە ناو هاوسەنگیەک، ئه‌وه‌ش له‌كاتێكدایه دەوڵەت و سوپای تورکیا زۆر متمانەی بە درۆنه‌كانی خۆی ده‌كات و لە هەمو شوێنێک پڕۆپاگەندەی بۆ دەکات".
له راگه‌یه‌ندراوه‌كه‌دا هاتوه، "لە 13ی (شوبات/2)ی 2023ەوە تائێستا هێزەکانمان 15 درۆنی هێرشبەر (فڕۆكه‌ی بێفڕۆكه‌وان) لە جۆرە جیاجیاکانیان خستوەتەخوارەوە، جگە لە هەندێک چالاکی کە بەهۆی کێشەی تەکنیکییەوە دیمەنەکانیان تۆمارنەکراون".
لیستی ئەو درۆنانەی به‌پێی راگه‌یه‌ندراوه‌كه خراونەتەخوارەوە
13ی شوباتی 2023 لە ئاسمانی گارە بەیرەقدار TB2
18ی شوباتی 2023 لە ئاسمانی گارە بەیرەقدار TB2
8ی حوزەیرانی 2023 لە ئاسمانی قەندیل ئانکا
14ی حوزەیرانی 2023 لە ئاسمانی قەندیل بەیرەقدار TB2
21ی حوزەیرانی 2023 لە ئاسمانی گارە ئانکا
22ی حوزەیرانی 2023 لە ئاسمانی قەندیل ئاکسونگور
5ی تەموزی 2023 لە ئاسمانی گارە ئاکنجی
8ی تەموزی 2023 لە ئاسمانی گارە بەیرەقدار TB2
17ی تەموزی 2023 لە ئاسمانی قەندیل ئانکا
30ی تەموزی 2023 لە ئاسمانی قەندیل ئاکنجی
15ی ئابی 2023 لە ئاسمانی گۆڕەپانی شەهید دەلیلی رۆژئاوای زاپ ئانکا
5ی تشرینی دوەمی 2023 لە ئاسمانی زاپ/ ئەشکەوتی برینداران بەیرەقدار TB2
6ی تشرینی دوەمی 2023 لە ئاسمانی گۆڕەپانی شەهید دەلیلی رۆژئاوای زاپ ئاکسونگور
28ی کانونی یەکەمی 2023 لە ئاسمانی گۆڕەپانی شەهید دەلیلی رۆژئاوای زاپ بەیرەقدار TB2
1ی ئاداری 20224 لە ئاسمانی زاپ/چیارەش فڕۆکەی بێفڕۆکەوانی هێرشبەری جۆری ئانکا لە لایەن هێزەکانمانەوە لەناوبرا.