پارێزگاری دهۆک ڕایگەیاند لە زووترین کاتدا زیانلێکەوتووانی لافاوەکەی پارێزگاکە قەرەبوو دەکرێنەوە.
ئەمڕۆ چوارشەممە، عەلی تەتەر، پارێزگاری دهۆک ڕایگەیاند، دوێنێ شەو بە ئامادەبوونی مەنسور بارزانی، لایەنە پەیوەندیدارەکانی حکومەت کۆوبوونەوە و تێیدا لەسەر بڕیاری مەسرور بارزانی سەرۆکی حکومەت، بڕیاردرا زیانلێکەوتووانی لافاوەکە لە زووترین کاتدا قەرەبوو بکرێنەوە.
ئەوەشی خستەڕوو کە هەموو هێزەکانی پێشمەرگە دەخرێنە خزمەت ئیدارەی پارێزگاکەوە بۆ بەهاناوەچوون و ڕزگارکردنی لێقەوماوان.
لە شەوی دووشەممەوە شەپۆلێک بارانبارین پارێزگای دهۆکی گرتەوە و بە هۆی دروستبوونی لافاوەوە سێ هاووڵاتی گیانیان لەدەستدا و 11ی دیکەش بریندار بوون، هاوکات زیان بە زیاتر لە 160 خانوو و دەیان ئۆتۆمبێل گەیشت.