بەرەبەیانی ئەمڕۆ هەینی، ئیسرائیل هێرشێكی ئاسمانی كردۆتە سەر چەند ناوچەیەك لە دەوروبەری شاری حەڵەب-ی سوریاو بەگوێرەی زانیارییەكان لانیكەم 38 كەس لە هێرشەكەدا كوژراون كە پێنج لەوانە ئەندامی هێزەكانی حزبوڵای لوبنان بون.

ئاوێنە: وەزارەتی بەرگریی سوریا رایگەیاندوە، هێرشەكە لە سەعات 1:45 خولەكی بەرەبەیانی ئەمڕۆ هەینی ئەنجامدراوەو چەند ناوچەیەكی لە دەوروبەری شاری حەڵەب كردۆتە ئامانج.

بەگوێرەی راگەیەندراوێكی روانگەی سوری بۆ مافەكانی مرۆڤ، ئامانجی هێرشەكە چەند كۆگایەكی چەك و تەقەمەنی "حزبوڵای لوبنان" بوە.

ئیسرائیل لەبارەی ئەو جۆرە هێرشانەوە لە سوریا بەگشتی هیچ لێدوانێك نادات.

ئاژانسی رۆیتەرز لەزاری دو سەرچاوەی ئەمنییەوە بڵاویكردۆتەوە كە لە هێرشەكەدا لانیكەم 38 كەس كوژراون كە پێنجیان ئەندامی هێزەكانی حزبوڵای لوبنان بون.

بەگوێرەی قسەی وەزارەتی بەرگریی سوریاش لە هێرشەكەدا ژمارەیەك كەسی مەدەنی و سەربازیی سوریا كوژراون.

روانگەی سوری ئاماژەی بەوەداوە كە لە هێرشەكەدا دەیان كەسیش برینداربون.

ئەو شوێنانەی كراونەتە ئامانج دەكەونە نزیك فڕۆكەخانەی نێودەوڵەتی حەڵەب.

لەدوای دەستپێكی گرژییەكانی سوریا لە ساڵی 2011ەوە تاوەكو ئێستا، ئیسرائیل سەدان هێرشی كردۆتە سەر سوریا كە لە زۆربەیاندا گروپەكانی لایەنگریی ئێرانی كردونەتە ئامانج.

لەدوای هێرشەكەی حەماس لە 7ی ئۆكتۆبەری ساڵی رابردو بۆ سەر ئیسرائیل و دەستكردنی ئیسرائیل بە هێرش بۆ سەر غەززە، هێرشەكانی ئەو وڵاتە بۆ سەر سوریا زیادیان كردوە.