ئاسایشی سلێمانی دەستگیركردنی سێ كەسی راگەیاند كە پاش دزیكردن، چوار جار هەڵساون بە سوتاندنی كەپری سەوزەو میوەی كاسبكارێك و بە بەهای 28 ملیۆن دینار زیانیان بەو كاسبكارە گەیاندوە.

ئاوێنە: بەڕێوەبەرایەتی ئاسایشی پارێزگای سلێمانی، ئەمڕۆ دوشەممە، لە راگەیەندراوێكدا وتی، بەداواداچون و لێکۆڵینەوەیان بۆ سکاڵای هاوڵاتییەک كردوە سەبارەت بە سوتانی کەپرێکی فرۆشتنی سەوزەو میوەی کاسبکارێک لە شاری سلێمانی، پاش سوتانی لەلایەن چەند تۆمەتبارێک و زیانی زۆری ماددی لێدەکەوێتەوە.

وتوشیەتی، دەستبەجێ بەهەوڵی بەڕێوەبەرایەتی ئاسایشی سلێمانی، لەسەر فەرمانی دادوەری لێکۆڵینەوە توانرا 3 تۆمەتباری ڕوداوەکە بدۆزرێتەوە و دەستگیربکرێن.

ئەوەشی خستۆتەڕو، تۆمەتبارەكان لەماوەی ڕابردودا پاش دزیکردن، 4 جار کەپری کەسبکارەكەیان سوتاندوە بەمەبەستی ونکردنی شوێنپەنجەی تاوانەکەیان و ئەوەش زیانی مادی زۆری لێ كەوتۆتەوە.

ئاسایش وتوشیەتی، لەماوەی سوتانی سێ جاری پێشوتر نزیکەی 11 ملیۆن دینار زیانی دەبێ و لەسوتانی چوارەمی 17 ملیۆن دینار زیانی مادی پێ دەگات بە دزینی (دۆمەڵان و هەنگوین و چەندین تۆن سەوزەو ومیوە)و تەواوی کەپرەکەی دەسوتێنن.

هێمای بۆ ئەوەش كردوە، لەئێستادا تۆمەتباران بەماددەی 342 لەیاسای سزادان دەستگیرکراون و لێکۆڵینەوە لەدۆسیەکانیان بەردەوامە.