نەوەی نوێ داوای‌ ئه‌نجامدانی‌ هه‌ڵبژاردنی‌ ئه‌نجومه‌نی‌ پارێزگاكانی‌ هه‌رێم ده‌كات
  2019-09-17       375       
جوڵانەوەی نەوەی نوێ داوا ده‌كات له‌گه‌ڵ هه‌ڵبژاردنی‌ ئه‌نجومه‌نی‌ پارێزگاكانی‌ عێراق، هه‌ڵبژاردنی‌ ئه‌نجومه‌نی‌ پارێزگاكانی‌ هه‌رێمی‌ كوردستانیش ئه‌نجامبدرێت‌و كۆمسیۆنی‌ عێراقیش سه‌رپه‌رشتی‌ هه‌ڵبژاردنه‌كه‌ بكات.

ئاوێنه‌: له‌راگه‌یه‌ندراوێكی‌ جوڵانه‌وه‌كه‌دا هاتووه‌، "هاوکاتی‌ هەڵبژاردنی‌ ئەنجومەنی‌ پارێزگاکان لەعێراقدا، دەرفەتێکی‌ گونجاوە هەمان هەڵبژاردن لەپارێزگاکانی‌ هەرێمی‌ کوردستانیشدا ئەنجامبدرێت‌و حکومەتی‌ خۆجێی‌ پارێزگاکان نوێبکرێنەوە".

نه‌وه‌ی‌ نوێ داوا ده‌كات كه‌ رێگە بدرێت کۆمیسیۆنی‌ باڵای‌ سەربەخۆی‌ هەڵبژاردنەکانی‌ عێڕاق سەرپەرشتیی‌ هەڵبژاردنەکە بکات، بەمەش تێچوی‌ هەڵبژاردنەکان دەکەوێتە ئەستۆی‌ حکومەتی‌ عێراق‌و دەرفەت نامێنێت حکومەتی هەرێمی‌ کوردستان بەبیانووی‌ هەبونی‌ قەیرانی‌ دارایی‌ باس لەبودجەی پێویست بۆ هەڵبژاردنەکان بکات‌و یاریی‌ بەدەنگ‌و چارەنوس‌و ئیرادەی‌ خەڵکەوە بکات.

ده‌قی‌ رونكردنه‌وه‌كه‌:

راگەیەنراوێک لەجوڵانەوەی نەوەی نوێ-وە

لەگەڵ خراپی‌ دۆخی‌ ئەمنیی‌ لەساڵی‌ 2005ەوە تائێستا، هەموو چوار ساڵ جارێک و لەوادەی‌ خۆیدا، لەسەرجەم پارێزگاکانی‌ عێراق جگە لەهەرێمی‌ کوردستان هەڵبژاردن ئەنجامدراوە و بۆ هەموو خولێک حکومەتی‌ خۆجێی‌ پارێزگاکان نوێکراوەتەوە، بەڵام لەو وادەیەوە تائێستا لەهەرێمی‌ کوردستان تەنها دووجار هەڵبژاردنی‌ ئەنجومەنی‌ پارێزگاکان ئەنجامدراوە و ئێستاش پارتیی و یەکێتیی لە ترسی هەڵبژاردن و چوونەوە بەردەم خەڵک جارێکی‌ تر هەڵبژاردنەکەیان بۆ وادەیەکی‌ نادیار دواخستووە و یاسای‌ ئەنجومەنەکەشیان لەبەرژەوەندیی‌ خۆیان و بۆ دانانی‌ کەسانی‌ حیزبیی‌ بەپارێزگاری‌ شارەکان هەمووار کردەوە.

جوڵانەوەی‌ نەوەی‌ نوێ پێیوایە هاوکاتی‌ هەڵبژاردنی‌ ئەنجومەنی‌ پارێزگاکان لەعێراقدا، دەرفەتێکی‌ گونجاوە هەمان هەڵبژاردن لەپارێزگاکانی‌ هەرێمی‌ کوردستانیشدا ئەنجام بدرێت و حکومەتی‌ خۆجێی‌ پارێزگاکان نوێبکرێنەوە و هاوکاری‌ خەڵک بن لەپێشکەشکردنی‌ باشتریین خزمەتگوزارییدا و کۆتایی‌ بەناشەرعییبوونی‌ وادەی‌ مانەوەی‌ ئەنجومەنی‌ ئێستاو پارێزگارەکان بهێنن.

جوڵانەوەی‌ نەوەی‌ نوێ داوا دەکات هاوکات لەگەڵ هەڵبژاردنی‌ ئەنجومەنی‌ پارێزگاکانی عێراقدا، هەمان هەڵبژاردن لە هەرێم ئەنجام بدرێت و رێگەش بدرێت کۆمیسیۆنی‌ باڵای‌ سەربەخۆی‌ هەڵبژاردنەکانی‌ عێڕاق سەرپەرشتیی‌ هەڵبژاردنەکە بکات، بەمەش تێچووی‌ هەڵبژاردنەکان دەکەوێتە ئەستۆی‌ حکومەتی‌ عێراق و دەرفەت نامێنێت حکومەتی هەرێمی‌ کوردستان بەبیانووی‌ هەبوونی‌ قەیرانی‌ دارایی‌ باس لە بودجەی پێویست بۆ هەڵبژاردنەکان بکات و یاریی‌ بەدەنگ و چارەنووس و ئیرادەی‌ خەڵکەوە بکات.

جگە لەوەش پێمانوایە ئەنجامدانی‌ هەڵبژاردنی‌ ئەنجومەنی‌ پارێزگاکان لەگەڵ پارێزگاکانی‌ تری‌ عێراقدا، کێشەی‌ پێکهێنانی‌ ئەنجومەنی‌ پارێزگای‌ هەڵەبجەش چارەسەر دەکات و چیدی‌ خەڵکی‌ خۆشەویستی‌ پارێزگای‌ هەڵەبجە لەچاوەڕوانیی‌ پێکنەهاتن و رازی‌ نەبوونی‌ پارتیی‌ و یەکێتییدا نابن بۆ ئەوەی‌ پارێزگاکەیان ببێتە خاوەنی‌ حکومەتی‌ خۆجێی‌ خۆیی‌ و دەستبکات بەکارکردن بۆ ئاوەدانکردنەوەی‌ پارێزگاکە و بەوەش رۆحی‌ شەهیدانی‌ ئەو پارێزگایە ئاسوودە بکات.

جوڵانەوەی‌ نەوەی‌ نوێ ٢٠١٩/٩/١٧
زۆرترین بینراو
© 2018 Awene Online, Inc. All Rights Reserved.
×