نێچیرڤان
بارزانی، سەرۆكی هەرێمی كوردستان رایگەیاند، بە نیگەرانی قوڵەوە لە ئۆپەراسیۆنی
سەربازی توركیا بۆ سەر رۆژهەڵاتی فوڕات لەسوریا دەڕوانن و جەختیش دەكاتەوە كە
"لەپێناو ڕاگرتنی شەڕو دروستكردنی ئارامیدا، لەهەوڵى بەردەوامداین. بۆ هەمو نێوانگیری
و هاوكارییەك ئامادەین."
هەروەك داواش لە كۆمەڵگەی نێودەوڵەتی و ئەنجومەنی ئاسایش دەكات بەجددی رۆڵی خۆیان
بگێڕن بۆ راگرتنی شەڕو گەڕانەوەی سەرقامگیری بۆ ناوچەكە.
ئاوێنە:
نێچیرڤان بارزانی، پاشنیوەڕۆی ئەمڕۆ پێنجشەممە، لەپەیامێكدا سەبارەت بە هێرشەكانی
توركیا بۆ سەر باكور و رۆژهەڵاتی سوریا، رایگەیاند"هەر لەسەرەتاوە بەوردى
چاودێریى دۆخەکە دەکەین و بەدڵگرانى و نیگەرانییەکى قوڵەوە لەئۆپەراسیۆنە سەربازییەکانى
ڕۆژهەڵاتى فورات لەسوریا دەڕوانین بەتایبەتى کە گروپە توندڕەوەکانى ئۆپۆزسیۆنى سوریا
تیایدا بەشدارن."
سەرۆكی هەرێمی
كوردستان وتوشیەتی"لەپێناو ڕاگرتنی شەڕو دروستكردنی ئارامیدا، لە هەوڵى بەردەوامداین
و بۆ هەمو نێوانگیری و هاوكارییەك ئامادەین."
داواشی لە کۆمەڵگەى
نێودەوڵەتى و ئەنجومەنى ئاسایش كردوە چارەسەرێکى دادپەروەرانە بۆ ئایندەى سوریا بدۆزێتەوە
بە جۆرێک مافى هەمو پێکهاتەکانى تیادا پارێزراو بێت و بە جددى ڕۆڵى خۆى بۆ ڕاگرتنى
شەڕ و گەڕانەوەى سەقامگیرى و پاراستنى ئاشتى و دیالۆگ و ڕێگەچارەى سیاسى بگێڕێت و ڕێگە
نەدرێت خەڵکى سڤیل دەربەدەر و ئاوارە ببن.
دەقی پەیامەكەی
نێچیرڤان بارزانی...
هەر لە سەرەتاوە
بە وردى چاودێریى دۆخەکە دەکەین و بە دڵگرانى و نیگەرانییەکى قوڵەوە لە ئۆپەراسیۆنە
سەربازییەکانى ڕۆژهەڵاتى فورات لە سوریا دەڕوانین بەتایبەتى کە گروپە توندڕەوەکانى
ئۆپۆزسیۆنى سوریا تیایدا بەشدارن. شەڕ، دەرگا بە سەر کوشتار و دەربەدەرى و ئاوارەبونى
خەڵکى سڤیل و دروستبونى ناسەقامگیرى لە تەواوى ناوچەکەدا دەکاتەوە و هەڕەشە و مەترسیى
سەرهەڵدانەوەى تیرۆریش جددیتر و گەورەتر دەکات.
ئێمە کە لە هەرێمی
كوردستان و عێراق قوربانییەكی زۆرمان بۆ تێكشكاندنی تیرۆر داوە و مەینەتییەکانى شەڕمان
بینیوە، زۆر بە نیگەرانى و هەستیارییەوە لە ئاڵۆزبونی دۆخەكە و تێکچونى ئاسایش و نەمانى
سەقامگیرى دەڕوانین کە دەرەنجامى چاوەڕواننەکراو و مەترسیدارى بۆ ناوچەکە و جیهان
لێ دەکەوێـتەوە، بۆیە لەپێناو ڕاگرتنی شەڕ و دروستكردنی ئارامیدا، لە هەوڵى بەردەوامداین
و بۆ هەمو نێوانگیری و هاوكارییەك ئامادەین.
شەڕ و پێکدادان
تەنیا ئاڵۆزى و پشێوى و مەترسی لە ناوچەکە زیاد دەکات، دەسکەوتەکانى تێکشکاندنى
داعش لەناو دەبات و لە بەرژەوەندیى هیچ لایەنێکدا نابێت، بۆیە داوا لە کۆمەڵگەى نێودەوڵەتى
و ئەنجومەنى ئاسایش دەکەین چارەسەرێکى دادپەروەرانە بۆ ئایندەى سوریا بدۆزێتەوە بە
جۆرێک مافى هەمو پێکهاتەکانى تیادا پارێزراو بێت و بە جددى ڕۆڵى خۆى بۆ ڕاگرتنى شەڕ
و گەڕانەوەى سەقامگیرى و پاراستنى ئاشتى و دیالۆگ و ڕێگەچارەى سیاسى بگێڕێت و ڕێگە
نەدرێت خەڵکى سڤیل دەربەدەر و ئاوارە ببن.