وەزارەتی بەرگری دانیمارك، ئەمڕۆ دوشەممە، رایگەیاند، سەربازانی وڵاتەكە لەسەرەتای مانگی داهاتودا دەگەڕێنەوە بۆ بنكەی سەربازی عەین ئەسەد لەعێراق بۆ دەستپێكردنەوەی مەشق بە هێزە ئەمنییەكانی عێراق، ئەوەش دوای ئەوەی بەهۆی گرژییەكانی نێوان ئەمریكاو ئێرانەوە بەشێكی زۆری سەربازانی وڵاتەكەی بۆ كوەیت گواستبوەوە.
ئاوێنە: وەزارەتی بەرگری دانیمارك رایگەیاند، دۆخی ئەمنی لەئێستادا جیاوازی نییە لەگەڵ پێش هێرشكردنە سەر بنكەی عەین ئەسەد، بۆیە گەڕانەوەی سەربازەكانمان بۆ بنكەكە جێی مەترسی نییە.
لای خۆیشییەوە، ترین برامسن، وەزیری بەرگری دانیمارك رایگەیاند، لە شەڕی تیرۆردا گرنگە جارێكی تر عێراق نەبێتەوە شوێنی وەرگرتن و مەشقپێكردنی تیرۆریستان.
وتیشی"بۆیە گرنگە دەست بە مەشقپێكردنی هێزە ئەمنییەكانی عێراق بكەینەوە تا خۆیان بتوانن ئاسایشی وڵاتەكەیان بپارێزن."
مانگی رابردو، دانیمارك، زۆربەی هێزە سەربازییەكانی خۆی، كە لە 130 سەرباز پێكدێن لە بنكەی سەربازی عەین ئەسەدەوە گواستەوە بۆ كوەیت ئەوەش بەهۆی نیگەرانی ئەمنییەوە لەدوای هێرشە موشەكییەكەی ئێران بۆ سەر بنكە سەربازییەكە.
یەكەی سەربازی دانیمارك لە بنكەی سەربازی عەین ئەسەد، بەشێكە لە هاوپەیمانی نێودەوڵەتی بۆ شەڕی دژبە داعش.