لەكاتێكدا
وەزارەتی تەندروستی ئێران رایدەگەیەنێت كە تا ئەمڕۆ یەكشەممە لە سەرتاسەری ئێران
ژمارەی ئەوانەی بە ڤایرۆسی كۆرۆنا گیانیان لەدەستداوە گەیشتۆتە 194 كەس، بەڵام
نوێنەری وەزیری ناوخۆ لە پارێزگای گەیلان دەڵێت، تا ئێستا تەنها لەو پارێزگایە
زیاتر لە 200 كەس بە كۆرۆنا گیانیان لە دەستداوە.
ئاوێنە: ئەمڕۆ
یەكشەممە، كیانوش جەهانپور، وتەبێژی وەزارەتی تەندروستی ئێران رایگەیاند، تا ئێستا
بە كۆی گشتی شەش هەزارو 566 حاڵەتی توشبون بە كۆرۆنا لە سەرتاسەری ئێران
تۆماركراون و 194 كەسیش بەهۆی ڤایرۆسەكەوە گیانیان لەدەستداوە.
بەڵام بەگوێرەی هەواڵێكی بەشی فارسی كەناڵی بی بی سی، هەر ئەمڕۆ محەمەد
حسێن قوربانی، نوێنەری وەزیری تەندروستی لە پارێزگای گەیلان رایگەیاندوە، تەنها لە
پارێزگای گەیلان بەهۆی ڤایرۆسی كۆرۆناوە زیاتر لە 200 كەس گیانیان لەدەستداوە.
هەروەها وتەبێژی وەزارەتی تەندروستی رایگەیاندبو كە تا ئەمڕۆ لە گەیلان 496
كەس توشی كۆرۆنا بون لەكاتێكدا نوێنەرەكەی وەزیری تەندروستی لەو پارێزگایە، وتی:
تا ئێستا 800 تا 900 حاڵەتی توشبون بە كۆرۆنا لەو پارێزگایە تۆماركراون.
محەمەد حسێن قوربانی، كە دو رۆژە كراوەتە
نوێنەری وەزیری تەندروستی لە پارێزگای گەیلان، رایگەیاندوە، ژێرخانی پارێزگاكە بۆ
روبەڕوبونەوەی بڵاوبونەوەی كۆرۆنا گونجاو نییە.
پارێزگای گەیلان بۆتە یەكێك لە ناوەندەكانی
بڵاوبونەوەی كۆرۆنا لە ئێران و لەچەند رۆژی رابردو چەندین جار بەرپرسانی پارێزگاكەو
نوێنەرەكانی لە پەرلەمانی ئێران هۆشداریان داوە سەبارەت بە دۆخی قەیراناوی پارێزگاكە
لە ڕوبەڕوبونەوەی ڤایرۆسەكە.