مستەفا چاورەش، ئەندامی سەركردایەتی یەكێتی نیشتمانی كوردستان رایدەگەیەنێت بەپێی پێشبینییەكان چاوەروان دەكرێت لەم هەفتەیەدا رێككەوتنی سیاسی نێوان پارتی‌و یەكێتی لەسەر پرسی پێكهێنانی كابینەی نۆیەمی حكومەتی هەرێمی كوردستان واژۆ بكرێت.

ئاوێنە: مستەفا چاورەش، ئەندامی سەركردایەتی یەكێتی نیشتمانی كوردستان لەوەڵامی ئەو پرسیارەی ئایا لەم هەفتەیەدا یەكێتی‌و پارتی رێككەوتنی سیاسی نێوانیان واژۆ دەكەن؟، بە ئاوێنەی وت "خۆتان دەزانن من ئەندامی ئەو لیژنەیە نیم كە دانوساندن دەكەن بۆ پێكهێنانی حكومەت، بەڵام بەپێی ئەو زانیاریانەی بەمن گەیشتون‌و لێدوانی بەرپرسانی یەكێتی‌و پارتی هیچ كێشەیەك نەماوە لەنێوان یەكێتی‌و پارتی بۆ پێكهێنانی كابینەی نۆیەم".


راشیدەگەیەنێت وابریارە لەم هەفتەیە رێككەوتنی نێوان یەكێتی‌و پارتی واژۆ بكرێت، وتیشی چاوەروان دەكەین دوای واژۆكردنی رێككەوتنەكە سەرۆكی پەرلەمان هەڵبژێردرێت‌و كابینەی نوێش پێكبهێنرێت، لەبارەی كۆبونەوەی سێ قۆڵی نێوان یەكێتی – پارتی – گۆران ، ئەو وتی "بێگومان دوای رێككەوتنی پارتی‌و یەكێتی لەلایەك‌و پارتی‌و گۆران لەلایەكی دیكە پێویست بەوە دەكات هەرسێ‌ لایەنەكە كۆبونەوەیەك ئەنجام بدەن".


ئاماژەبەوەش دەكات كۆبونەوەی سلاێ‌ قۆڵی كارێكی باشە بۆ ئەوەی هیچ نەبێت بەرپرسیارەتی كابینەی نوێ‌ لەئەستۆ بگرن‌و هەر تەنها لەچوارچێوەی دروشم‌و دروشمبازی نەمێنێتەوە.