زیلان ڤەژین، هاوسەرۆكی پارتی ژیانی ئازادی كوردستان "پژاك" رایدەگەیەنێت ئەگەری رودانی شەرێكی گەورە زیادی كردوە‌و رژێمی داگیركاری ئێران لەلێواری مەرگدایە، دەشڵێت "لە داهاتویەکی نزیکدا کاردانەوەکانی گەمارۆ و بڕیارەکانی ئەمریكا لە بەرامبەر ئێران دەردەکەوێت".
ئاوێنە: زیلان ڤەژین، هاوسەرۆكی پارتی ژیانی ئازادی كوردستان "پژاك" لەمیانی وتارێكیدا كە میدیاكانی نزیك لە پارتی كرێكارانی كوردستان بڵاویان كردوەتەوە رایدەگەیەنێت ڕۆژ بە ڕۆژ زیاتر دەردەکەوێت کە ماوەی دیکتاتۆری لە ئێران بەرەو کۆتاییە و ئیدی خەڵکی ئێران لە نادادپەروەری، هەژاری، بێکاری و کێشە کۆمەڵایەتیەکان بێزار بون، بەپێویستیشی دەزانێت خەڵک بێدەنگی بشکێنن و لە پێناو گەیشتن بە مافەکانیان تێکۆشانی زیاتر بکەن.
دەشڵێت "خستنە لیستی تیرۆری سوپای پاسداران لە لایەن ئەمریكا، هەڵوێستی توندی دەوڵەتی ئێران و کاردانەوەی جیاوازی لە لایەن وڵاتانی دیکە لێکەوتەوە بە تایبەت لە لایەن ئیسرائیل، عەرەبستانی سعودی و ئیمارات و ئەگەری پێکدادانی سەربازی و شەڕێکی گەورەشی لە نێوان ئێران و ئەمریکا زیاتر کردوە و وەک ڕابردو قوربانی ئەو شەڕە گەلانی ناوچەکە دەبن".