نرخی زێڕ لە بازاڕەکانی جیهاندا بەردەوامە لە بەرزبوونەوە بەیانی ئەمڕۆش گەیشتە بەرزترین ئاستی لە ماوەی شەش مانگی رابردوودا.
ئاوێنە: بەیانی ئەمڕۆ نرخی زێڕ لە بازاڕەکانی جیهاندا بە رێژەی 0.8% بەرزبووەوە و گەیشتە هەزار و 838 دۆلار بۆ هەر ئۆنسەیەک، هاوکات لە ویلایەتە یەکگرتووەکانی ئەمریکا بە رێژەی 1% بەرزبوونەوەی بەخۆیەوە بینی و یەک ئۆنسە بە هەزار و 843.90 دۆلار مامەڵەی پێوەکرا.
بەرزبوونەوەی نرخی زێڕ هاوکاتە لەگەڵ نزیکبوونەوەی کۆبوونەوەی ئەنجومەنی یەدەگی ئەمریکا کە بڕیارە سبەی چوارشەممە بەڕێوەبچێت و بڕیاری نوێ لەبارەی سیاسەتی نەختینەیی بانکی بدات.
زێڕ یەکێکە لەو ئامرازانەی ویلایەتە یەکگرتووەکانی ئەمریکا بۆ باڵانسکردنی دۆخی ئابووری و رێگریکردن لە هەڵاوسان بەکاریدەهێنێت، ئەویش لە رێگەی زیادکردنی سوودەکانیەوە.