وتەبێژی كۆمسیۆنی هەڵبژاردنەكانی عێراق ڕایگەیاند، لە چوارچێوەی ئامادەكارییەكانی كۆمسیۆن بۆ ئەنجامدانی هەڵبژاردنی ئەنجومەنی پارێزگاكان زیاتر لە یەك ملیۆن ناسنامە بۆ چاودێران، میدیاكاران، ڕێكخراوەكان و چاودێرانی حزبی چاپ كراوە، لەو ژمارەیەش شەش هەزاری بۆ ڕێكخراو و میدیاكار و چاودێرە نێودەوڵەتییەكانە.

جومانە غەلای، وتەبێژی كۆمسیۆن هەڵبژاردنەكانی عێراق لەبارەی چاپكردنی كارتی ناسنامەی میدیاكاران و ڕێكخراوەكان و چاودێرانی حزبی، بۆ میدیا ناوخۆییەكان دەدوێت.

جومانە غەلای ڕاگەیاند، لە چوارچێوەی ئامادەكارییەكانی كۆمسیۆن بۆ ئەنجامدانی هەڵبژاردنی ئەنجومەنی پارێزگاكان، كۆمسیۆنی هەڵبژاردنەكان یەك ملیۆن و ١٦٠ هەزار كارتی ناسنامە بۆ چاودێران، ڕێكخراو و میدیاكارانی ناوخۆیی و نێودەوڵەتی چاودێرانی حزب تەواو كردووە، ئەو كارتی ناسنامانەش بەسەر نوسیگەی كۆمسیۆن لە ١٥ پارێزگا دابەش كراوە.

جومانە غەلای داوای لە میدیاكاران و چاودێران ناوخۆیی و چاودێرانى لایەنە سیاسییەكان كرد، سەردانی نوسیگەكانی كۆمسیۆن بكەن بۆ وەرگرتنەوەی كارتی ناسنامەكانیان، دەشڵێت، لە كۆی گشتی ئەو كارتی ناسنامانەى چاپكراون شەش هەزار كارتی بۆ چاودێران و میدیاكاران ڕێكخراوانی نێودەوڵەتی تەرخان كراوە.

ئاماژەی بەوەش كرد، ٩٣ بانگهێشتنامە بۆ ڕێكخراوە نێودەوڵەتییەكان و نوێنەرایەتییەكان و دەزگا دیپلۆماسییەكان نێردراوە بە مەبەستی بەشداریكردن لە چاودێریكردنی پرۆسەی هەڵبژاردنەكان، دەشڵێت، لیژنەیەك بە سەرۆكایەتی دادوەر فەتاح محەمەد حسێن پێكهێنراوە، بۆ وەرگرتنی چاودێرانی نێودەوڵەتی.

حكومەتی عێراق ١٨ـی كانوونی یەكەمی ئەمساڵی، بۆ ئەنجامدانی هەڵبژاردنەكانی ئەنجوومەنی پارێزگاكانی عێراق دیاری كردووە، هەروەها پاڵپشتی بۆ كۆمسیۆنی هەڵبژاردنەكانیش دووپات كردووەتەوە.