وەزارەتی ناوخۆی عێراق بڵاوی كردەوە، لە سەرەتای ئەمساڵەوە ١٢ هەزار بەكارهێنەر و بازرگانی ماددەی هۆشبەر دەستگیر كراون، هەروەها ١٨ تۆن و نیو ماددەی هۆشبەر دەستی بەسەردا گیراوە.
موهەنەد حاتم ساڵح، وتەبێژی بەڕێوەبەرایەتی گشتی كاروباری ماددە هۆشبەرەكان لە وەزارەتی ناوخۆی عێراق، لەبارەی دەستبەسەرداگرتنی چەندین تۆن ماددەی هۆشبەر و دەستگیركردنی چەندین بەكارهێنەر و بازرگانیی ماددەی هۆشبەر لە سەرەتای ئەمساڵەوە، ئامارێكی بڵاو كردەوە.
بە پێی ئەو ئامارەی وەزارەتی ناوخۆی عێراق، لە چوارچێوەی هەوڵەكانیان بۆ ڕووبەڕووبوونەوەی ماددە هۆشبەرەكان و لە ڕێگەی هەماهەنگی بەرزیان لەگەڵ هەرێمی كوردستان، لە ماوەی ئەمساڵدا توانراوە لە سەرجەم پارێزگاكانی عێراق ١٨ تۆن و نیو ماددەی هۆشبەر دەستی بەسەردا بگیرێت، هەروەها نزیكەی ١٨ هەزار بەكارهێنەر و بازرگانی ماددەی هۆشبەر دەستگیر كراون.
ئاماژە بەوەش كراوە، هەماهەنگییەكی بەهێز لە نێوان هێزە ئەمنییەكاندا هەیە، بە مەبەستی دەستگیركردنی ئەو بەكارهێنەر و بازرگانانەی، كە ئێستا ژمارەیەكی كەمیان ماوە و دەستگیركردنی ڕۆژانەی ئەو تۆمەتبارانە بەردەوامە.
شارەزایانی عێراقی هۆشداری دەدەن لە بڵاوبوونەوەی ماددەی هۆشبەر لە وڵاتدا و داوا لە مامۆستایانی ئایینی و میدیا و كەسە دیارەكانی عێراق دەكەن، گەنجان و هاوڵاتییانی عێراق لە مەترسییەكانی ماددەی هۆشبەر ئاگادار بكەنەوە.