كۆمسیۆنی باڵای سەربەخۆی هەڵبژاردنەكانی عێراق ئاشكرایكرد، تا ئێستا 255 كاندید لە كێبڕكێی هەڵبژاردنی پارێزگاكان دورخراونەتەوە كە زۆرینەیان تۆمەتی "بەعسیبون" دراوەتە پاڵیان.

ئاوێنە: عیماد جەمیل، سەرۆكی تیمی راگەیاندنی كۆمیسیۆنی باڵای سەربەخۆی هەڵبژاردنەكانی عێراق، ئەمڕۆ دوشەممە لە لێدوانێكدا بە رۆژنامەنوسانی راگەیاند: تا دوێنێ‌ 255 كاندید لە كێبڕكێی هەڵبژاردنی پارێزگاكان دورخراونەتەوە.

بەقسەی ئەو بەرپرسەی كۆمیسیۆن، 197 كاندید لەلایەن دەستەی لێپرسینەوەو دادپەروەری (دەستەی ریشەكێشكردنی بەعس) دورخراونەتەوە، 57 كاندیدی تریشیان بەهۆی بونی دۆسیەی تاوان، كاندیدێكیش بەهۆی گەندەڵی و یەكێكی تریش بەهۆی تێوەگلانی لە دۆسیەی تیرۆر دورخراونەتەوە.

بەگوێرەی داتاكانی كۆمیسیۆن، زیاتر لە 23 ملیۆن هاوڵاتی مافی دەنگدانیان هەیە لە هەڵبژارنی پارێزگاكانی عێراق كە لەنێویاندا زیاتر لە 10 ملیۆن هاوڵاتی، تائێستا تۆماری دەنگدانیان تازەكردوەتەوە.

296 حزبی سیاسی لە 50 هاوپەیمانێتیدا بەشداری هەڵبژاردنی پارێزگاكان دەكەن كە بڕیاڕە 18ی كانونی یەكەمی ئەمساڵ بەڕێوەبچێت.

كاندیدەكان كێبڕكێی لەسەر 275 كورسی لە 15 پارێزگا دەكەن كە 75 كورسی تەرخانكراوە بۆ كۆتای ژنان و 10 كورسیش بۆ كەمە نەتەوەو ئایینییەكان.