وەزارەتی تەندرووستیی ئیسرائیل و فەڵەستین نوێترین ئاماری قوربانییەکانی خۆیان بەهۆی شەڕی نێوانیانەوە بڵاو كردەوە، کە لەماوەی ڕۆژانى شەڕدا تائێستا ٣٧٨٥ کەس لە فەلەستنییەکان و ١٤٠٠ کەس لە ئیسرائیلییەکان گیانیان لەدەستداوە، لەگەڵ برینداربوونى هەزاران کەسی دیکە لە هەردوولا.
وەزارەتی تەندرووستی فەڵەستین و وەزارەتی تەندرووستیی ئیسرائیل، لەبارەی ژمارەی كوژراو و بریندارەكانی جەنگی نێوانیانەوە، لە ڕاگەیاندراوێكدا ئاماری نوێیان بڵاو كردەوە.
لە ڕاگەیاندراوەكەی وەزارەتی تەندرووستیی فەڵەستیندا هاتووە، بەهۆی بۆردوومانەكانی ئیسرائیلەوە سێ هەزار و ٧٨٥ كەس لە غەزە گیانی لەدەستداوە و نزیكەی ١٢ هەزار كەسیش بریندار بوون، كە ٦٠٠ كەسیان منداڵن.
وەزارەتی تەندرووستیی ئیسرائیلیش بڵاوی كردەوە، ژمارەی گیانلەدەستدان بەهۆی هێرشەكانی حەماسەوە گەیشتووەتە هەزار و ٤٠٠ كەس و ژمارەی بریندارانیش گەیشتووەتە سێ هەزار و ١٩٢ كەس، لەو ژمارەیە ٣٦٤ كەسیان باری تەندرووستییان ناجێگیرە.
لە بەرەبەیانی ٧ـی ئەم مانگەوە چەكدارانی حەماس لە ڕێگەی سەدان مووشەكەوە هێرشیان كردە سەر ئیسرائیل، كە لە ئەنجامدا بە سەدان كەس بوونە قوربانیی و ئاوارە بوون، تا ئێستاش شەڕ و پێكدادانی نێوان چەكدارانی حەماس و سوپای ئیسرائیل بەردەوامە.