ئەمریکا بڕیاریدا بە داخستنی کونسوڵخانەکەی لە ئەدەنەی تورکیا، ئەوەش دوای ئەوەی لەو شارەدا خۆپیشاندان دژی هێرشەکانی ئیسرائیل ئەنجامدرا.
باڵیۆزخانەی ئەمریکا لە ئەنقەرە رایگەیاند، بەهۆی ناڕەزایەتییەکان دژی ئیسرائیل، بە شێوەیەکی کاتی کۆنسوڵخانەکەیان لە شاری ئەدەنە داخستووە.
باڵیۆزخانەکە ئاماژەی بەوەکردووە، "لە چەند هەفتەی داهاتوودا پێشبینی دەکرێت بەهۆی رووداوەکانی ئیسرائیل و غەززەوە خۆپێشاندانی گەورە لە سەرتاسەری تورکیا بکرێن، ئەگەر بۆ مەبەستی ئاشتییانەش بکرێت، دەکرێت گردبوونەوەکان گەشە بکەن و تووندوتیژییان لێ بکەوێتەوە".
لە بەیاننامەکەدا فەرمان به کارمەندەکانی حکومەتی ئەمریکا کراوە، گەشتەکانیان بۆ کۆنسوڵخانەی ئەدەنە کەمبکەنەوە و ئەگەر ناچار نەبن نەچنە ئەو شوێنە.
دوای شەڕی نێوان ئیسرائیل و بزووتنەوەی حەماس، هاووڵاتییانی تورکیا لەبەردەم باڵیۆزخانەی ئەمریکا لە ئەنقەرە و لەبەردەم کۆنسوڵخانەکانی ئەمریکا لە ئیستەنبووڵ و ئەدەنە گردبوونەوە.