فەرماندەی دەستەی گشتی هێزە چەكدارەكانی ئێران لەگەڵ وەزیری بەرگری توركیا لەڕێگەی تەلەفۆنەوە قسەیان كردوەو داوایكردوە توركیا "هەمو ئامڕازەكانی خۆی بۆ رێگری لە بەردەوامی تاوانەكان و پشتیوانی لە خەڵكی كەرتی غەززە، بەكاربهێنێت."
ئاوێنە: بەپێی میدیای رەسمی ئێران، ئەمڕۆ هەینی، محەمەد باقری، فەرماندەی دەستەی گشتی هێزە چەكدارەكانی ئێران لە پەیوەندییەكی تەلەفۆنیدا لەگەڵ یاشار گولەر، وەزیری بەرگریی توركیادا رایگەیاندوە، "دەبێت هەنگاوی جددی بنرێت بۆ رێگری لە بەردەوامی رژێمی زایۆنی لە هێرشە دڕندانەكانی بۆ سەر خەڵكی مەدەنی لە غەززەو گەیاندنی هاوكاریی مرۆیی بەو خەڵكە."
محەمەد باقری پشتیوانییە فراوانەكانی ئەمریكای بۆ ئیسرائیل، لەوانە پشتیوانیكردنی ئەو دەوڵەتە بە چەكی قورس بە "واتای بەشداریی ئەمریكا لە تاوانەكانی رژێمی زایۆنی" ناوبردوە كە "دۆخەكە لە غەززە ئاڵۆزتر دەكات" و هۆشداریشی لەبارەی سەرەنجامەكانییەوە داوە.
فەرماندەی دەستەی گشتی هێزە چەكدارەكانی ئێران داواشی لە توركیا كردوە "هەمو ئامڕازەكانی خۆی بۆ رێگریی لە بەردەوامی تاوانەكان و پشتیوانی لە خەڵكی غەززە بەكاربهێنێت."
بەگوێرەی میدیای رەسمی ئێران، لە پەیوەندییە تەلەفۆنییەكەدا، یاشار گولەر، وەزیری بەرگری توركیا ئاماژەی بە هەوڵەكانی وڵاتەكەی داوە بۆ كەمكردنەوەی ئاڵۆزییەكان و وەستاندنی شەڕ و جەختیشی كردۆتەوە كە ئەنقەرە بەردەوام دەبێت لەو هەوڵانەی.