سەرۆکی ئەمریکا رایگەیاند، لە ماوەی 24 بۆ 48 کاتژمێری دیکە دەروازەی سنوری رەفح بۆ گەیاندنی 20 بارهەڵگری هاوکاری بۆ خەڵکی غەززە دەکرێتەوە، ئەوەش دوای ئەوەی چەندین جار هەریەکە لە بەرپرسانی میسر و ئیسرائیل رەتیانکردەوە.

جۆو بایدن سەرۆکی ئەمریکا رایگەیاند، پێشبینی دەکرێت لە ماوەی 24 بۆ 48 کاتژمێری داهاتو، 20 ئۆتۆمبێلی هەڵگری هاوکاریی مرۆیی بە سنوری میسردا بەرەو کەرتی غەززە بەرێبکەون، ئەویش دوای ئەوەی هەریەکە لە ئیسرائیل و عەبدولفەتاح سیسی سەرۆکی میسر رازیبون.

هەر لەو بارەیەوە، ئەنتۆنیۆ گۆتەرێز ئەمینداری گشتی نەتەوەیەکگرتوەکان ئاماژەی بەوەکرد، بەرپرسانی میسر و دەروازەی سنوری رەفح، تاکە ئامڕازی گەیاندنی هاوکارییە بە هاوڵاتیانی غەززە، کە لە ژێر کۆنتڕۆڵی ئیسرائیلدا نەبێت، داواش دەکەن بە زوترین کات رێگە بە گەیاندنی هاوکارییەکان بدرێت.

ئیسرائیل بە شێوەیەکی یەکجاری رەتی دەکاتەوە سنورەکانی بۆ گەیاندنی هاوکاری بە غەززە بکاتەوە، بە نێوەندگیری ئەمریکاش بە کردنەوەی دەروازەی رەفحی میسری رازی بوە، ئەویش وەک هەوڵێک بۆ رێگریکردن لە گەیشتنی هاوکاری بە هێزەکانی سەر بە بزوتنەوەی حەماس.

پێشتریش جۆو بایدنی سەرۆکی ئەمریکا رایگەیاندبو، عەبدولفەتاح سیسی سەرۆکی میسر رازی بوە بە تێپەڕبونی هاوکارییەکان بۆ غەززە کە بریتییە لە 20 بارهەڵگر، بە رای نەتەوەیەکگرتوەکانیش ئەو برە هاوکارییە کەمە و خەڵکی غەززە بە لایەنی کەمەوە رۆژانە پێویستیان بە 100 بارهەڵگر هاوکاری دەبێت.