ئاژانسی رەسمی هەواڵیی عێراق، ئەمڕۆ شەممە، لە زاری سەرچاوەیەكی حكومییەوە بڵاویكردەوە، بانكی ناوەندیی عێراق و لایەنی ئەمریكی رێككەوتون لەسەر پاڵپشتیكردن و بەرزكردنەوەی باڵانسی پێنج بانكی عێراقی بە دۆلار.
ئاوێنە: سەرچاوە حكومییەكە بە ئاژانسەكەی راگەیاندوە، لەماوەی چەند رابردودا، وەفدی بانكی ناوەندیی عێراق و لایەنی ئەمریكی بەرپرس لە چالاكییەكانی حەواڵەی دەرەكی، لە ئەبوزەبی چەند كۆبونەوەیەكی چڕیان ئەنجامداون و دانوستانەكان چەند بڕیارو میكانیزمێكیان لێكەوتۆتەوە كە یارمەتیدەر دەبن بۆ ئاسانكردنی رێكارەكاتی تایبەت بە حەواڵە دەرەكییەكان لەڕێگەی دەروازەی فرۆشتنی دراوی بیانییەوە.
هەروەها سەرچاوەكە ئەوەشی وتوە، هەردولا رێككەوتون لەسەر پاڵپشتیكردن و بەرزكردنەوەی باڵانسی پێنج بانكی عێراقی بە دۆلار لە هەژمارەكانیان لە بانكە ئوردنییەكان و حەواڵەكان لەڕێگەی بانكی جەی پی مۆرگانەوە.
سەرچاوەكە ئەوەشی خستۆتەڕو، چارەسەری ئەو كێشانەش كراوە كە پەیوەستن بەو حەواڵانەی رەتكراونەتەوەو رێككەوتن كراوە لەسەر ئەوەی كە رەتكردنەوەی حەواڵەكان پشتبەستو بێت بە هۆكاری بەهێز.