ئەلێكسی یەرخۆف، باڵیۆزی روسیا لە توركیا رایگەیاند، بەهۆی دۆخی ئیدلبی سوریاوە هێستریایەكی دژبە روسیا لە تۆڕە كۆمەڵایەتییەكان لەتوركیا دروست بوەو هەڕەشەی كوشتیان لێ كردوە.
ئاوێنە: ئەلێكسی یەرخۆف لە چاوپێكەوتنێكدا لەگەڵ ئاژانسی سپوتنیك-ی روسی رایگەیاند، لەگەڵ ئەوەم كە گرژییەكانی سوریا ئازاردەرن و زۆر جێی نیگەرانین، لەسەرەتادا چەند ئەفسەرێكی روس كوژران و دوای ئەوەش چەند سەربازێكی تورك.
هێمای بۆ ئەوەش كردوە كە بەهۆی ئەو دۆخەی لە ئیدلب هەیە، هەڕەشەی لێكراوەو بەشێك لە هەڕەشەكان بریتی بون لە "ماڵئاوایی لە ژیانت بكەن"، "هیچ كەس بۆت خەمگین نابێت"، "ئێستا كاتی ئەوەیە لەناوببرێیت."
میدیاكانی روسیا لەزاری ئیرینا كاسیمۆڤا، پاشكۆی رۆژنامەوانی نوێنەرایەتی دیپلۆماتی روسیاوە بڵاویان كردۆتەوە، لەسەر داوای ئێمە، دەسەڵاتدارانی توركیا رێوشوێنی ئەمنی زیاتریان لە دەوروبەری باڵیۆزخانەی روسیا لە ئەنكەرە گرتۆتەبەر.
پێشتر لە ساڵی 2016، ئەندریە کارلۆڤ، باڵوێزی روسیا لە ئەنكەرە بە دەستی نەتەوەپەرستێکی تورک کوژرا.