وەزارەتی بەرگریی ئەمریكا پشتڕاستیکردەوە كە هێرشەکەی دوێنێی بەغدا لەلایەن ئەمریکاوە کراوەتە سەر بارەگاکەی حەشدی شەعبی، كە وتەی بەرپرسانی عێراقی، دو کوژراو و حەوت برینداری لێکەوتەوە.
ئاوێنە: نیوەڕۆی دوێنێ پێنجشەممە، لە گەڕەکی فەلەستینی بەغدا دەنگی تەقینەوەیەکی بەهێز بیسترا، دواتر بزوتنەوەی نوجەبا کوژرانی دو فەرماندەی خۆی بە ناوەکانی ئەبو تەقوا سەعیدی و یاریدەدەرەکەی بە ناوی ئەبو ئیمتیحان راگەیاند.
پات رایدەر، وتەبێژی وەزارەتی بەرگری ئەمریكا-پێنتاگۆن لە کۆنگرەیەكی رۆژنامەوانیدا رایگەیاند، "ئەو کەسە [ئەبو تەقوا] چالاکانە بەشداربو لە پلاندانان و هێرشکردنە سەر هێزەکانمان، ئێمەش هەمیشە وتومانە کە مافی بەرگریکردن لە خۆمانمان هەیە و رێکاری پێویست بۆ پاراستنی هێزەکانمان دەگرینەبەر."
هەروەها وتیشی"عێراق هاوبەشێکی بەنرخی ئێمەیە، ئێمە لە نزیکەوە کار لەگەڵ هێزە ئەمنییەکانی عێراق دەکەین و بۆ ماوەی ساڵانێکی زۆر پەیوەندیمان لەگەڵ هێزە ئەمنییەکانی عێراق هەبوە لە بواری راهێنان و راوێژکاریی بۆ هەوڵەکانیان لە دژی تیرۆر، هەروەها ئێمە بەردەوام دەبین لە کارکردن لەگەڵ هاوبەشە عێراقییەکانمان لە نزیکەوە".
وتەبێژی وەزارەتی بەرگری ئەمریكا وتیشی"دەزانین کە هێزە ئەمنییەکانی عێراق بەردەوامن لە هاوکاریکردنی ئێمە لە هەندێک باردا بۆ دیاریکردنی شوێنی ئەو گروپانەی سەر بە ئێرانن و هێرشدەکەنە سەر هێزەکانی ئەمریکاو ئێمە ئەو هاوکارییانە زۆر دەنرخێنین."