قوباد تاڵەبانی، جێگری سەرۆك وەزیرانی هەرێم لە كۆبونەوەیدا لەگەڵ وەفدێكی نەتەوە یەكگرتوەكان رایگەیاند، ھەوڵی جدی ھەیە بۆ ھەموارکردنەوەی یاسای بودجە. دەشڵێت، پێویستە حكومەتی هەرێم هەمو لایەنە كوردییەكان پێكەوە گفتوگۆ لەگەڵ لایەنە عێراقییەكان بكەن تا یاسای بودجە بەشێوەیەک ھەمواربکرێتەوە کە کێشەی موچەی فەرمانبەران و بەشە بودجەی ھەرێم بەیەکجاری چارەسەر بکات.
ئاوێنە: بەپێی راگەیەندراوێكی نوسینگەكەی، ئەمڕۆ سێشەممە لە هەولێر، قوباد تاڵەبانی، جێگری سەرۆکوەزیرانی هەرێم لەگەڵ وەفدێکی نەتەوەیەکگرتوەکان بە سەرۆکایەتی کلۆدیۆ کۆردۆن، جێگری نوێنەری تایبەتی سکرتێری گشتی بۆ عێراق کۆبوەوە و پێکەوە باسی چەند پرسێکی جێی بایەخی ھەردولایان تاوتوێ کرد.
بەگوێرەی راگەیەندراوەكە لە تەوەری سەرەکی کۆبونەوەکەدا گفتوگۆکراوە لەبارەی چۆنییەتی چارەسەرکردنی کێشەکانی نێوان ھەرێم و بەغداو لەناویشیاندا کێشەی بودجەی ھەرێمی کوردستان.
لەم بارەیەوە قوباد تاڵەبانی رایگەیاند؛ "وەفدی ھەرێم لە دوایین سەردانیدا بۆ بەغدا گفتوگۆی باش و ئەرێنییان کردوە لەگەڵ لایەنە پەیوەندیدارەکانی حکومەتی فیدراڵ و ھەوڵی جدیش ھەیە بۆ ھەموارکردنەوەی یاسای بودجە."
جێگری سەرۆك وەزیرانی هەرێم وتیشی"لەم قۆناغەدا پێویستە حکومەتی ھەرێم و ھەمو لایەنە کوردستانییەکان پێکەوە گفتوگۆی جدی لەگەڵ لایەنە عێراقییەکان و فراکسیۆنە جیاوازەکانی ناو پەرلەمانی عێراق بکەن تا یاسای بودجە بەشێوەیەک ھەمواربکرێتەوە کە کێشەی موچەی فەرمانبەران و بەشە بودجەی ھەرێم بەیەکجاری چارەسەر بکات."
لە بەشێکی دیکەی کۆبونەوەکەدا تاوتوێی ھەڵبژاردنەکانی ئەنجومەنی پارێزگاکان و چۆنییەتی پێکھێنانی حکومەتە خۆجێیەکان کرا. لەمبارەیەشەوە جێگری سەرۆکوەزیران جەختی کردەوە،"دەبێت بەپێی ئەنجامەکانی ھەڵبژاردن لە پرۆسەی پێکھێنانی حکومەتە خۆجێیەکاندا رێز لە دەنگ و ئیرادەی خەڵک بگیرێت و ھاوکاتیش نابێت ھەوڵی پەراوێزخستنی ھیچ لایەن و پێکھاتەیەک بدرێت."
سەبارەت بە ھەڵبژاردنی پەرلەمانی کوردستانیش، جێگری سەرۆکوەزیران جەختی کردەوە لەسەر "پێویستیی بەڕێوەچونی ھەڵبژاردن بەشێوەیەکی پاک و بێگەرد کە جێی رەزامەندی ھەموان بێت و مافی ھەمو لایەک و لەناویشیاندا پێکھاتەکان پارێزراوبێت."
وەك لە راگەیەندراوەكەدا هاتوە، لە دوایین تەوەری کۆبونەوەکەشدا باسی گۆڕانکارییەکانی ناوچەکە و دۆخی سیاسی عێراق کراو "ھەردولا ھاوڕابون کە پێویستە لایەنە عێراقییەکان ھەستیاری دۆخەکە لەبەرچاو بگرن و بە گرتنەبەری سیاسەتی حەکیمانە خۆیان بەدوربگرن لە ھەر جۆرە ھەڵوێست و ھەنگاوێک کە سەقامگیری عێراق و ھەرێمی کوردستان بخاتە مەترسییەوە."