دەستەی دەروازە سنوورییەکانی عێراق بڵاویکردەوە، گەشتیارێکیان لە فڕۆکەخانەی نەجەف دەستگیرکردووە، کە 50 کارتی بانکی پێبووە و ویستوویەتی لەگەڵ خۆی بیانباتە دەرەوەی وڵات بەمەبەستی سپیکردنەوەی پارە.
بەگوێرەی راگەیەندراوی دەستەکە کە ئەمڕۆ پێنجشەممە بڵاویکردووەتەوە، گەشتیارەکە 50 ماستەرکارد و ڤیزاکاردی پێبووە، هەوڵداوە لە رێگەی فڕۆکەخانەی نەجەفەوە گەشت بکات بۆ دەرەوەی وڵات، بەڵام لەوێ دەستگیرکراوە.
دواتریش، تۆمەتبار و کارتەکان رەوانەی بنکەی پۆلیسی فڕۆکەخانەی نێودەوڵەتی نەجەف کران بۆ ئەوەی بابەتەکە بخەنە بەردەم دادوەری لێکۆڵەر بۆ گرتنەبەری رێوشوێنە یاساییە پێویستەکان.