پارتی ته‌قه‌دوم بە سەرۆكایەتی محه‌مه‌د حه‌لبوسى، ئەمڕۆ پێنجشەممە رایگه‌یاند، شه‌علان كه‌ریم، كاندیدی فه‌رمی پارته‌كه‌یانه بۆ وه‌رگرتنی پۆستی سه‌رۆكی پەرلەمانی عێراق.
ئاوێنە: یه‌حیا محه‌مه‌دی سه‌ركرده له پارتی ته‌قه‌دوم و په‌رله‌مانتاری ئه‌و حزبه له ئه‌نجومه‌نی نوێنه‌رانی عێراق رایگه‌یاند، له کۆبونەوەی ئەمڕۆ پێنجشەممەی پارتی تەقەدوم بڕیاردرا بە کاندیدکردنی شێخ شەعلان كه‌ریم بۆ پۆستی سەرۆکی پەرلەمان.
ئاماژه‌ی به‌وه‌شكردوه، پۆستی سەرۆکی پەرلەمان پشكی پارتی ته‌قه‌دومه به‌وپێیه‌ی نوێنەرایەتی گەورەترین فراكسیۆنی سوننە دەکات بە 44 په‌رله‌مانتار.
بڕیارە رۆژی 14ی ئەم مانگە پەرلەمانی عێراق یەكەم دانیشتنی وەرزی نوێی خۆی ئەنجام بدات كە بەرنامەی كاری كۆبونەوەكە یەك بڕگەیەو ئەویش بریتییە لە هەڵبژاردنی سەرۆكی نوێی پەرلەمانی عێراق.
سەرەتای مانگی 11ی ساڵی رابردو، بەبڕیاری دادگای باڵای فیدراڵی عێراق، محەمەد حەلبوسی، سەرۆكی پەرلەمانی عێراق ئەندامێتی پەرلەمانی لێ سەندرایەو بەوەش پۆستی سەرۆكی پەرلەمان لەو كاتەوە بەچۆڵی ماوەتەوە.