جەعفەر شێخ مستەفا، جێگری سەرۆکی هەرێمی کوردستان رایگەیاند، بۆ هەڵبژاردنی پەرلەمانی کوردستان رۆژێک لە مانگی 5 دیاریدەکرێت. دەشڵێت، سه‌قفێكی زه‌مه‌نی بۆ یه‌كخستنه‌وه‌ی هێزه‌كانی پێشمه‌رگه دیاریكراوه. بەبێ ئەوەی ئاماژه به‌و واده‌یه بكات كه دیاریكراوه.
ئاوێنە: جەعفەر شێخ مستەفا جێگری سەرۆکی هەرێمی کوردستان لە نوێترین لێدوانیدا بۆ رۆژنامەنووسان باسی لە گرفتەکانی نێوان هەرێم و بەغدا و پرسی مووچە و هەڵبژاردنی پەرلەمانی کوردستان کرد و وتی:" بەپێی ئەو دەسەڵاتەی دراوە بە سەرۆکی هەرێمی کوردستان رۆژێک لە مانگی 5 دیاریدەکات بۆ هەڵبژاردنی پەرلەمانی کوردستان، ئەگەر هیچ بەربەست و گرفتێک روونەدات".
وتیشی:" وەفدی هەرێمی کوردستان و عیراق هەوڵی زۆریانداوە بۆ چارەسەرکردنی کێشەکان، بەڵام تا ئێستا هیچ هەنگاوێکی ئەوتۆ نەدراوە بۆ چارەسەرکردنی کێشەکان کە لەنێوانماندا هەیە".
لەبارەی یەكخستنەوەی هێزی پێشمه‌رگه جه‌عفه‌ر شێخ مسته‌فا وتی، "له‌لایه‌ن ئه‌مریكا و پێشمه‌رگه‌وه نوسراوێك واژۆ كراوه و سه‌قفێكی زه‌مه‌نی بۆ یه‌كخستنه‌وه‌ی هێزه‌كانی پێشمه‌رگه دیاریكراوه" بەبێ ئەوەی ئاماژه به‌و واده‌یه بكات كه دیاریكراوه.
سەبارەت بە بارودۆخی ئێستای عیراق و ناوچەکە جێگری سەرۆکی هەرێمی کوردستان ئاماژەی بەوەکرد:"بەگشتی ئەو باوردۆخەی ئێستا لە عیراقدا هەیە بەتەنها عیراق نییە و بەڵکو ناوچەکە بە گشتی لە دۆخێکی ئاڵۆزدایە، بۆیە هەموومان دژی هەموو جۆرە شەڕ و پێکدادانێکین و پێویستمان بە ئارامی و ئەمنیەت و ئاسایش هەیە، ئەمڕۆ نە هەرێمی کوردستان و نە خەڵکی عیراق پێویستییان بە شەڕ نییە".