میدیای یەكێتی بڵاویكردەوە، لایەنە براوەكان لەسەر دابەشكردنی پۆستەكانی پارێزگای كەركوك گەیشتونەتە رێككەوتنی سەرەتایی بەجۆرێك كە پۆستی پارێزگار بۆ یەكێتی، سەرۆكی ئەنجومەن بۆ عەرەب و قائیمقامیتی ناوەندیی كەركوك بۆ توركمان بێت.
ئاوێنە: كەناڵی كوردسات نیوز، ئەمڕۆ شەممە، لە راپۆرتێكدا بڵاویكردەوە، "رێككەوتنی سەرەتایی لەنێوان لایەنە براوەكان كراوە بۆ پێكهێنانی حكومەتی خۆجێی كەركوك بەجۆرێك پۆستی پارێزگار بۆ یەكێتی، سەرۆكی ئەنجومەن بۆ عەرەب، قائیمقامی ناوەندیی كەركوك بۆ توركمان، پۆستی جێگرانی پارێزگار بۆ پارتی و لایەنە عەرەبییەكان و بڕیاردەی ئەنجومەن بۆ توركمان بێت."
رۆژی چوارشەممەی رابردو 21/2/2024 لایەنە براوەكانی كەركوك بەسەرپەرشتی محەمەد شیاع سودانی، سەرۆك وەزیرانی عێراق كۆبونەوەو لەسەر چەند خاڵێك رێككەوتن كە یەكێكیان ئەوەبو لایە بەشداربوەكانی کۆبونەوەکە لە ماوەی حەوت ڕۆژدا وەرەقەی کارکردن و داواكاری خۆیان پێشكەش بكەن كە "میکانیزمە گونجاوەکان بۆ پێکهێنانی حکومەتی خۆجێی لەخۆبگرێت."
پەروین فاتیح، سەرۆكی كاتی ئەنجومەنی پارێزگای كەركوك بە میدیای یەكێتی راگەیاند، ئێستا لێكتێگەیشتنی باش لەنێوان لایەنە براوەكانی كەركوك هەیە، لەئەگەری پێشكەشكردنی داواكاریی لایەنە براوەكان و رێككەوتن لەسەریان، بەزوترین كات ئەنجومەنی پارێزگای كەركوك كۆدەبێتەوە.
بەگوێرەی راپۆرتەكەی میدیای یەكێتی، "لایەنە عەرەبی و توركمانییەكان چونەتە بەغدا بۆ پێشكەشكردنی داواكارییەكانیان لەوبارەیەوە، دوای ئەوەی لە كۆبونەوەی لایەنە براوەكان لەگەڵ سودانی، حەوت رۆژ بۆ پێشكەشكردنی داواكاری لایەنە براوەكانی كەركوك دیاریكرا."
پەروین فاتیح وتویەتی، "لە ئەگەری دواكەوتنی پێشكەشكردنی داواكاریی لایەنە براوەكان و دواكەوتنی رێككەوتن لەپاش ئەو حەوت رۆژە دیاریكراوە، چاوەڕوان دەكرێت كۆبونەوەیەكی دیكەی لایەنە براوەكان بكرێت و دوای ئەو كۆبونەوەیە بڕیار لەسەر كۆبونەوەی ئەنجومەنی پارێزگاكە دەدرێت."