فه‌و‌زى هه‌ريرى، سه‌رۆكى ديوانى سه‌رۆكايه‌تيى هه‌رێم رایگەیاند، دوای ئەوەی بڕیارەكەی دادگای فیدرالی لەبارەی یاسای هەڵبژاردنی پەرلەمانی كوردستان بەڕەسمی گەیشتە سەرۆكایەتیی هەرێم، ئەوا سەرۆكی هەرێم رۆژێك بۆ هەڵبژاردن دیاری دەكات.

ئاوێنە: فەوزی هەریری، ئەمڕۆ شەممە، لە لێدوانێكدا بۆ رۆژنامەنوسان وتی"بڕیارەكەی دادگای فیدراڵی لەبارەی یاسای هەڵبژاردنی پەرلەمانی كوردستان، هێشتا بەڕەسمی نەگەیشتۆتە ئێمە، هەر كات بڕیارەكە بەڕەسمی گەیشتە ئێمە، ئەوكات سەرۆكی هەرێم هەڵوێستی دەبێت لەسەر بڕیارەكەو پاشان رۆژی هەڵبژاردن دەستنیشان دەكرێت."

وتیشی"ئێمە هیوادارین پاش ئەو بڕیارە، لایەنە سیاسییەكانی هەرێم پێداچونەوە بەخۆیاندا بكەن، ئەوە بزانن كە پێویستە بەرژەوەندی و قەوارەی هەرێمی كوردستان لەسەروی بەرژەوەندیی حزبی بێت تاكو هەڵبژاردن بكرێت."

جەختیشی كردەوە كە سەرۆكایەتیی هەرێم و سەرۆكی هەرێم لەسەدا 100 كۆكن لەسەر ئەوەی كە دەبێت هەڵبژاردن بكرێت.

وتیشی، كۆمسیۆنی هەڵبژاردنی عێراق داوایكردوە سێ بۆ چوار مانگ وادەی هەبێت بۆ ئامادەكاری، هەفتەی رابردو كۆبونەتەوەیەك هەبو لەگەڵیان لە سەرۆكایەتی هەرێم تەئكیدیان لە هەمان بابەت كردەوە، بۆیە سەرۆكی هەرێم پێویستە بەرچاوڕون بێت تاكو رۆژێك دەستنیشان نەكات، كۆمسیۆنی هەڵبژاردنەكانی عێراق بڵێت، ئێمە پێمان ناكرێت لەو رۆژەدا.