جوڵانەوەی نەوەی نوێ داوا لهسەرۆکایەتیی هەرێمی كوردستان دهكات بەزوترینکات ڕۆژی هەڵبژاردنی پهرلهمانی كوردستان دیاری بکات، بهپێهوانهوه، "شتی زۆر خراپتر ڕودەدات."
ئاوێنه: هیمداد شاهین، وتەبێژی جوڵانەوەی نەوەی نوێ ڕاگهیهندراوێكی بڵاوكردۆتهوهو لهبهشێكیدا هاتووه، "لەئێستا بەدواوە هیچ بیانویەک نەماوە بۆ ئەنجامنەدانی هەڵبژاردنو دانەنانی وادەی هەڵبژاردن. ئەگەر ئەمجارە بەزوترینکات سەرۆکایەتیی هەرێم ڕۆژی هەڵبژاردن دیاری نەکات ئەوا شتی زۆر خراپتر ڕودەدات."
ئاماژه بۆ ئهوهش دهكات، "پارتییو یەکێتیی لەترسی دۆڕان ئەوە دوساڵ زیاترە بەپاساوی بێمانا هەڵبژادن ئەنجام نادەن".
وتەبێژی جوڵانەوەی نەوەی نوێ بهپێویستی دهزانێت كه سەرۆکایەتیی هەرێم دەستبەجێ رۆژی ئەنجامدانی هەڵبژاردن دیاری بکات.
بڕیار بو ڕۆژی 25ی ئهم مانگه هەڵبژاردنی خولی شەشەمی پەرلەمانی کوردستان بهڕێوه بچێت، بەڵام کۆمسیۆنی باڵای سهربهخۆی هەڵبژاردنەکانی عێراق لهبهیاننامهیهكدا ڕایگەیاند كه ناتوانن ئهو ههڵبژاردنه لهو وادهیهدا بهڕێوه ببهن.
کۆمسیۆنی باڵای سهربهخۆی هەڵبژاردنەکانی عێراق چاوهڕوانی دادگای باڵای فیدراڵی عێراقی دهكرد بۆ یهكلاییكردنهوهی سكاڵایهكی تایبهت بەھەمواری یاسای ھەڵبژاردنی پەرلەمانی کوردستان.
21ی ئهم مانگه دادگای باڵای فیدراڵی عێراق بڕیاری كۆتایی دا لهسهر یاسای ھەڵبژاردنی پەرلەمانی کوردستان، بهپێی بڕیارهكه دادگا 11 كورسی كۆتاكانی لابردو ژمارهی كورسییهكانی پهرلهمانی بۆ 100 كورسی كهمكردهوه، ههروهها ژمارهی بازنهكانی ههڵبژاردنی لهیهك بازنهوه بۆ چوار بازنه زیادكرد.