هێزەکانی هاوپەیمانیی نێودەوڵەتی دوو کاروان چەک و پێداویستیی سەربازی و لۆجستییان بە ئۆتۆمبێلی بارهەڵگر و فڕۆکەی بارهەڵگر رەوانەی بنکەی سەربازیی خەرابە جیر لە ناوچەی رمێلان لە باکووری حەسەکە کرد.
روانگەی سووری بۆ مافەکانی مرۆڤ بڵاویکردووەتەوە، هێزەکانی هاوپەیمانان کاروانێک چەک و پێداویستیی سەربازی و لۆجستییان لە دەروازەری سنووریی وەلیدەوە رەوانەی رۆژئاوای کوردستان کردووە.
راشیگەیاندووە، کاروانە سەربازییەکە بە پشتیوانیی فڕۆکەی بێفڕۆکەوان و هەلیکۆپتەری سەربازی رەوانەی رۆژئاوای کوردستان کراوە، کە پێکهاتبوو لە 60 ئۆتۆمبێلی بارهەڵگر، کە چەک و پێداویستیی سەربازی و تانکەری سوتەمەنییان پێبووە.
ئەوەشی راگەیاندووە، هێزەکانی هاوپەیمانان هاوکات لەگەڵ ئەو کاروانە سەربازییەدا، بە فڕۆکەی بارهەڵگری سەربازی، کەرەستەی پێشکەوتووی سەربازی و سیستمی دژە فڕۆکەیان گواستووەتەوە بۆ بنکەی سەربازیی خەرابەجیر لە باکووری حەسەکە.
ئاماژەی بەوەشکردووە، هێزەکانی هاوپەیمانان لە دوای هێرشەکانی گروپی مقاومەی ئیسلامی بۆ سەر بنکە و بارەگاکانی لە باکوور و رۆژهەڵاتی سووریا، دەیەوێت خۆی بەهێز و پڕچەک بکات.
لەو چوارچێوەیەشدا، هاوپەیمانان لە رۆژانی هەشت تاوەکو 21ی شوبات، زیاتر لە هەشت کاروانی دیکەی چەک و پێداویستیی سەربازی بە زیاتر لە 210 بارهەڵگر، رەوانەی بنکەکانیان لە باکوور و رۆژهەڵاتی سووریا کردووە و هاوکات بەپشتیوانی فڕۆکەی جەنگی و هەلیکۆپتەر، لەگەڵ هێزەکانی هەسەدەدا دەستیان بە راهێنانی سەربازی کردووە.