رێكخراوی هەنگاو رایگەیاند، ئەمشەو دوشەممە، کۆڵبەرێکی خەڵکی شاری سەقز بە ناوی سەید جەعفەر فەرەجی، لە کاتی کۆڵبەریدا لە سنوری شاری بانە بە تەقەی ڕاستەوخۆی هێزە چەکدارەکانی کۆماری ئیسلامیی ئێران کوژرا.
ئاوێنە: رێكخراوەكە لە راگەیەندراوێكدا ئەوەشی وتوە، سەید جەعفەر فەرەجی، کۆڵبەری خەڵکی گوندی دەورە قەڵای شاری سەقز لە کاتی کۆڵبەریدا لە سنوری هەنگەژاڵی شاری بانە بە تەقەی ڕاستەوخۆی هێزە چەکدارەکانی ئێران کوژرا.
سەید جەعفەر فەرەجی تەمەن 42 ساڵ، خێزاندار و باوکی دو منداڵ بوە. بە وتەی سەرچاوەیەکی ئاگادار بۆ هەنگاو، تەرمی ئەم کۆڵبەرە لە ئێستادا بۆ نەخۆشخانەی سەڵاحەدینی ئەیوبی لە شاری بانە گواستراوەتەوە.
بەپێی ئامارەكانی رێكخراوی هەنگاو، لە ماوەی ساڵی 2023دا 22 کۆڵبەر لە سنورەکانی شاری بانە کوژراون و 116 کۆڵبەریش بریندار بون.