هەڵبژاردنی خولی 12ی پەرلەمانی ئێران سەعات 12ی شەوی رابردو کۆتاییهات و لە بازنە جیاوازەکانی هەڵبژاردن وردە وردە ئەنجامە بەراییەکانی دەنگدان بڵاودەکرێنەوە. میدیاكانی ئێران دەڵێن، رێژەی بەشداری نزیکەی 41% بوە، ئەوەش لەكاتێكدایە كە رێژەی بەشداری لە پارێزگای سنە(كوردستان) 25%بوە.

 ئاوێنە: میدیای فەرمیی ئێران بڵاوی کردەوە، زیاتر لە 25 ملیۆن کەس لەوانەی مافی دەنگدانیان هەبووە، دەنگیان داوە؛ کە دەکاتە نزیکەی 41%ی دەنگدەران و لە پارێزگای سنە(كوردستان) رێژەی بەشداری 25% بوە.

لە هەندێک لە بازنەکانی هەڵبژاردنی رۆژهەڵاتی کوردستانیش ناوەندەکانی هەڵبژاردن ئەنجامی بەرایی دەنگدانیان بڵاوکردوەتەوە. بەپێی راپۆرتی ناوەندی هەڵبژاردنی پارێزگای ئیلام، لە کۆی 471 هەزار کەس کە مافی دەنگدانیان هەبووە، 259 هەزار و 858 کەس دەنگیان داوە، واتە رێژەکە 55% بووە.

 پارێزگای ئیلام لە دو بازنەی هەڵبژاردن پێکدێت و 3 نوێنەری لە پەرلەمانی ئێران هەیە؛ لە بازنەی باشوری پارێزگاکە ئەسەدوڵڵا چراغی و لە بازنەی باکوریش فەرەیدون هیمەتی و سارا فەلاحی دەنگیان هێناوە.

پارێزگای کرماشانیش لە 6 بازنەی هەڵبژاردن پێکدێت و 8 نوێنەری لە پەرلەمانی ئێران هەیە؛ ئەنجامی بەرایی دەنگدانی هەندێک لە بازنەکانی هەڵبژاردنیش راگەیەندراوە. رەستگار یوسفی لە بازنەی هەورامان و جوانڕۆ، موجتەبا بەخشی پور لە بازنەی شاباد و داڵاهو، فەتحوڵڵا حوسێنی لە بازنەی قەسری شیرین، گیەڵان و سەرپێڵ، وەحید ئەحمەدی لە بازنەی کەنگاوەر و هەرسین، جەواد حوسێنی کیا لە بازنەی سونقوری کولیایی دەنگیان بۆ بون بە پەرلەمانتاری ئێران هێناوە.

 لە بازنەی سەقز و بانەی پارێزگای سنەش موحسین بیگلەری دەنگی هێناوە. سنە لە 5 بازنەی هەڵبژاردن پێکدێت و 6 نوێنەری لە پەرلەمانی ئێران هەیە.

لە پارێزگای ورمێ كە لە 10 بازنەی هەڵبژاردن پێکدێت و 12 نوێنەری لە پەرلەمانی ئێران هەیە. قەسیم عوسمانی لە بازنەی هەڵبژاردنی بۆکان، عەبدولکەریم حوسێن زادە لە بازنەی هەڵبژاردنی شنۆ و نەغەدە، کەمال حوسێن پور لە بازنەی هەڵبژاردنی پیرانشار و سەردەشت و سەلام ستودەش لە مهاباد دەنگیان هێناوە.

 پارێزگای لوڕستانیش 7 بازنەی هەڵبژاردنە و 9 نوێنەری هەیە. ئیحسان یاوەری، سەرۆکی ناوەندی هەڵبژاردنی ئەو پارێزگایە دەڵێت، رێژەی بەشداری بەرز بوە، بەڵام وردەکاری لەبارەی كاندیدە دەرچوەکان دیار نییە.