پۆلیسی زاخۆ ئاشكرایكرد، ئەمڕۆ شەممە، تەرمی گەنجێكی 24 ساڵان لەنێو روباری خابیری زاخۆ دۆزرایەوە كە هیچ شوێنەوارێكی تاوان لەسەر جەستەی نییە.
ئاوێنە: بەڕێوەبەرایەتی پۆلیسی زاخۆ لە راگەیەندراوێكدا وتی، سەعات 12:30 خولەكی ئەمڕۆ شەممە، تەرمی گەنجێك بەناوی (ن. ع. م.) تەمەن 24 ساڵان و دانیشتوی زاخۆ لەنێو روباری خابیر لەنزیك پردی بێدار دۆزراوەتەوە.
ئەوەشی خستۆتەڕو، دەستبەجێ تیمە پۆلیسی فریاكەوتن، بەڵگەی تاوان و نەهیشتنی تاوان چونە شوێنی روداوەكە و پاشان تەرمی گەنجەكە بۆ پزیشكی دادی لە زاخۆ گواسترایەوە.
پۆلیسی زاخۆ وتوشیەتی، بەپێی لێكۆڵینەوە سەرەتاییەكان هیچ شوێنەوارێكی تاوان لەسەر جەستەی ئەو گەنجە نییەو بە بڕیاری دادوەرو بەگوێرەی ماددەی 405 لە یاسای سزادان لێكۆڵینەوە دەستی پێكردوە.