بەنگین رێكانی، وەزیری ئاوەدانکردنەوەی عێراق ئەمڕۆ شەممە، لەمیانی كردنەوەی سەنتەرێکی پزیشکی بۆ شێرپەنجە لە دهۆک لەبارەی موچەی فەرمانبەرانی هەرێمی کوردستان وتی، ''تاوەکو هەردو حکومەت دەگەنە رێککەوتن، موچە مانگانە دەنێردرێت".
ئاوێنە: بەنگین رێکانی، وەزیری ئاوەدانکردنەوەی عێراق سەنتەرێکی پزیشکیی شێرپەنجەی لە دهۆک کردەوە کە لەلایەن حکومەتی فیدراڵییەوە جێبەجێ کراوە بە رۆژنامەنوسانی وت ''ئەمە یەکەم پڕۆژەیە کە حکومەتی فیدراڵی لە دهۆک جێبەجێی دەکات کە لەلایەن وەزارەتی ئێمەوە جێبەجێ کراوە".
بەنگین رێکانی وتیشی"پڕۆژەکە لە ساڵی 2019ـەوە پارەی بۆ تەرخانکراوە، بەڵام ئێستا تەواو بووە و تەنیا ئەوە ماوە ئامێری پزیشکی تێدا دابنرێت، کە ئەوەش جێبەجێ دەکەین".
بەنگین رێکانی لەبارەی موچەی فەرمانبەرانی هەرێمی کوردستان ئاماژەی بەوەدا، ''تاوەکو ئەو کاتەی حکومەتی فیدراڵی و حکومەتی هەرێمی کوردستان دەگەنە رێککەوتن، موچە نابڕدرێت و مانگانە لە بەغداوە دەنێردرێت".