رەجەب تەیب ئەردۆغان، سەرۆک کۆماری تورکیا سه‌ردانی‌ هەولێرو بەغدا ده‌كات‌و  یاریدەدەرێكی سەرۆکی هەرێم-یش ده‌ڵێت، "خۆشحاڵین بەسەردانەکە، چونکە هاوکار دەبێت بۆ بەرەوپێشبردنی زیاتری پەیوەندییەکانی تورکیا لەگەڵ عێراق بەشێوەیەکی گشتی‌و هەرێمی کوردستان بەتایبەتی".

ئاوێنه‌: ئەمڕۆ شەممە، فەلاح مستەفا یاریدەدەری سەرۆکی هەرێمی کوردستان بۆ کاروباری دەرەوە لەکۆنفرانسێکی رۆژنامەوانیدا لەچوارچێوەی بەڕێوەچونی کۆنفرانسی دیپلۆماسی ئەنتاڵیا؛ باسی لەسەردانەکەی رەجەب تەیب ئەردۆغان، سەرۆک کۆماری تورکیا بۆ هەولێرو بەغدا کرد.

فەلاح مستەفا ڕایگه‌یاند، "بڕیاروایە لەدوای هەڵبژاردنی شارەوانییەکانی تورکیا، سەردانە چاوەڕوانکراوەکەی رەجەب تەیب ئەردۆغان، سەرۆک کۆماری تورکیا بۆ هەولێرو بەغدا ئەنجامبدرێت".

بڕیارە ڕۆژی‌ 31-03-2024 هەڵبژاردنی شارەوانییەکانی توركیا بەڕێوەبچێت.

وەکو ئەوەی فەلاح مستەفا باسی کرد،  ئەوان وەك هەرێمی کوردستان خۆشحاڵن بەسەردانەکە، "چونکە هاوکار دەبێت بۆ بەرەوپێشبردنی زیاتری پەیوەندییەکانی تورکیا لەگەڵ عێراق بەشێوەیەکی گشتی و هەروەها هەرێمی کوردستان بەتایبەتی".

رۆژی دووشەممە 06-02-2024، رەجەب تەیب ئەردۆغان رایگەیاند، دوای هەڵبژاردنی شارەوانییەکان لەکۆتایی ئاداری ئەمساڵ سەردانی عێراق دەکات.

ئەم سەردانەی ئەردۆغان بۆ بەغدا دەبێتە یەکەم سەردانی سەرۆک کۆماری تورکیا لەدوای‌ سەردانەکەی تورگوت ئۆزال لەکۆتایی هەشتاکانی سەدەی رابردو، هەرچەندە لەساڵانی 2008، 2009 و 2011، ئەردۆغان وەک سەرۆک وەزیرانی تورکیا سەردانی بەغدای کرد لەوکاتەشدا نوری مالیکی، سەرۆک وەزیرانی عێراق بو.