کۆنسوڵخانەی ئەمهریکاو بەریتانیا لەهەولێر پێشوازی لەراگەیاندنو دیاریكردنی رۆژی ئهنجامدانی هەڵبژاردنی پهرلهمانی كوردستان دهكاتو بە "زۆر گرنگ بۆ داهاتوی هەرێمی کوردستان" ناوی دەبات.
ئاوێنه: ئەمڕۆ یەکشەممە، کۆنسوڵخانەی ئەمهریکا لەهەولێر لهبڵاوكراوهیهكدا لهتۆڕی كۆمهڵایهتی ئێكس رایگەیاند، پێشوازی لهدیاریكردنی ڕۆی ههڵبژاردنی پهرلهمانی كوردستان دهكهن لهلایهن سهرۆكایهتی ههرێمهوه.
کۆنسوڵخانەی ئەمهریکا نوسیویهتی، "پشتگیریی لەهەڵبژاردنی ئازادو دادپەروەرانە دەکەین، کە بۆ دیموکراسییەکی تەندروستو داهاتوی هەرێمی کوردستان زۆر گرنگە."
هاوکات کونسوڵخانەی گشتیی بەریتانیا لهههولێر لەراگەیەندراوێکدا لەپەڕەی کونسوڵخانەکە لەفەیسبووک رایگەیاند، کونسوڵخانەی بەریتانیا پێشوازی لەم راگەیەندراوە دەکات، هەڵبژاردن زۆر گرنگە بۆ دەربڕینی دەنگی خەڵکی هەرێمی کوردستانی عێراقو داهاتوی ناوچەکە.
نێچیرڤان بارزانی، سهرۆكی ههرێمی كوردستان ئهمڕۆ یهكشهممه بۆ جاری چوارم فهرمانی ههرێمیی بۆ دیاریكردنی ڕۆژی ههڵبژاردنی پهرلهمانی كوردستان واژۆكرد، بهپێی مهرسومهكه، ڕۆژی 10ی 6ی 2024 ههڵبژاردنی خولی شهشهمی پهرلهمانی كوردستان بهڕێوهدهچێت.
سەرۆکایەتی هەرێمی کوردستان تا ئێستا سێ وادەی بۆ ئەنجامدانی هەڵبژاردنی پەرلەمانی کوردستان دیاریکردووە (1ی 10ی 2022، 18ی 12ی 2023، 25ی 2ی 2024)، بەڵام لە هیچ کام لەو وادانەدا هەڵبژاردن ئەنجام نەدراوە وەک چۆن لەم گرافیکەی خوارەوە ڕونکراوەتەوە.
دوایین واده بۆ بهڕێوهچونی هەڵبژاردنی خولی شەشەمی پەرلەمانی کوردستان ڕۆژی 25ی مانگی ڕابردو، بەڵام کۆمسیۆنی باڵای سهربهخۆی هەڵبژاردنەکانی عێراق لهبهیاننامهیهكدا ڕایگەیاند كه ناتوانن ئهو ههڵبژاردنه لهو وادهیهدا بهڕێوه ببهن.
کۆمسیۆنی باڵای سهربهخۆی هەڵبژاردنەکانی عێراق چاوهڕوانی دادگای باڵای فیدراڵی عێراقی دهكرد بۆ یهكلاییكردنهوهی سكاڵایهكی تایبهت بەھەمواری یاسای ھەڵبژاردنی پەرلەمانی کوردستان.
21ی2ی 2024 دادگای باڵای فیدراڵی عێراق بڕیاری كۆتاییدا لهسهر یاسای ھەڵبژاردنی پەرلەمانی کوردستان، بهپێی بڕیارهكه، دادگا 11 كورسی كۆتاكانی لابردو ژمارهی كورسییهكانی پهرلهمانی بۆ 100 كورسی كهمكردهوه، ههروهها ژمارهی بازنهكانی ههڵبژاردنی لهیهك بازنهوه بۆ چوار بازنه زیادكرد.