تا ئێستا بەشێكی وەزارەتەكانی سەر بەحكومەتی كاربەرێكەری هەرێم لیستی مووچەی فەرمانبەرانیان ئامادە نەكردوە بۆ ئەوەی وەزارەتی دارایی بۆ حكومەتی ناوەندی رەوانە بكات بۆ دابینكردنی مووچەی مانگی دوو.
بەپێی نووسراوێكی وەزارەتی دارایی حكومەتی كاربەرێكەری هەرێم، تا ئێستا وەزارەتەكانی سامانە سروشتیەكان، كارەبا، كار وكاروباری كۆمەڵایەتی، كاروباری شەهیدان وئەنفالكراوان، رۆشنبیری و لاوان، ئەوقاف ودەستەكانی مافی مرۆڤ، وەبەرهێنان، ناوچە كوردستانییەكانی دەرەوەی ئیدارەی هەرێم، دەستپاكی، كۆمسیۆنی هەڵبژاردن وئەنجومەنی وەزیران لیستی مووچەیان بە پێی داواكاری ئامادەكردووە.
ئاماژەی بەوەشكردوە: فەرمانبەرانی پەیوەندیدار بە ئامادەكردنی لیستی مووچە لەدەوام دەبن بۆ تەواوكردنی لیستی مووچە وبڕیاریشە تا 24 كاتژمێری داهاتوو لیستی مووچەی سەرجەم وەزارەتەكانی دیكەش تەواو بكرێت.
تا ئێستا فەرمانبەرانی هەرێم موچەی مانگی دووی ئەمساڵیان وەرنەگرتووە وموچەی سێ مانگی كۆتایی ساڵی رابردووش پێنەدراوە و دیاریش نیە كەی ئەو موچە نەدراوانە دابەش دەكرێن.