بەڕێووبەری کۆمسیۆن هەڵبژاردنەكانی عێراق لقی سلێمانی ڕایگەیاند، هەموو ئامادەكارییەكان كراون بۆ ئەنجامدانی هەڵبژاردنی پەرلەمانی هەرێمی كوردستان، کە١٠ـی حوزەیرانی ئەمساڵ ئەنجام دەدرێت، دەشڵێت، ڕێژەی لە ٦٥%ى تۆماری دەنگدەرانى هەرێم نوێکراوەتەوە
هاوڕێ تۆفیق شارەزاى بوارى هەڵبژاردنەکان لە بارەی ئامادەكارییەكان بۆ ئەنجامدانی هەڵبژاردنی پەرلەمانی هەرێمی كوردستان و ڕێژەی نوێكردنەوەی تۆماری دەنگداران، بۆ میدیا عەرەبییەكان دەدوێت.
هاوڕی تۆفیق ڕایگەیاندووە، دوای ئەوەی دادگای فیدراڵی بڕیاری چارەسەركردنی بەشێك لەو كێشانەی دەركرد، كە هەبوون، لەوانە كورسی كۆتاكان، بازنەی هەڵبژاردنەكان و لایەنی سەرپەرشتیارى هەڵبژاردنەكانی هەرێمی كوردستان، هەموو بابەتە یاسایی و تەكنیكییەكان ئامادە كراون بۆ ئەوەی هەڵبژاردن ئەنجام بدرێت.
ئاماژەی بەوەشكرد، ڕێژەی نوێكردنەوەی تۆماری دەنگدەرانی هەرێمی كوردستان گەیشتووەتە نزیكەی لە ٦٥٪ـی كۆی ئەو كەسانەی مافی دەنگدانیان هەیە، ئەمەش ڕێژەیەكی زۆر باشە، بە بەراورد بە هەڵبژاردنی پەرلەمانی عێراق و ئەنجوومەنی پارێزگاكان.
باسی لەوەشكرد، هەموو ڕێكارەکان تەواوکراون و هیچ بیانوویەك نییە بۆ ئەنجام نەدانی هەڵبژاردن لە ١٠ـی حوزەیرانی ئەمساڵ، هەروەها لە ٥ى ئەم مانگەوە تاوەكو ١٤ـی ئەم مانگە کۆمسیۆن دەست بە تۆماركردنی ناوی حزب و هاوپەیمانیەكان دەكات بۆ هەڵبژاردنی پەرلەمانی هەرێمی كوردستان و ئەو وادەیەش درێژ ناكرێتەوە.
جێگەی ئاماژەیە، دوێنێ نێچیرڤان بارزانی سەرۆكی ماوە بەسەرچووی هەرێمی كوردستان ڕۆژی ١٠ی مانگی حوزەیرانی ئەمساڵی وەك وادەی بەڕێوەچوونی هەڵبژاردنی پەرلەمانی هەرێمی كوردستان دیاریكرد.