بافڵ تاڵەبانی، سەرۆكی یەكێتی لە كۆبونەوەیدا لەگەڵ جینین پلاسخارت، نێردەی تایبەتی سكرتێری گشتی نەتەوەیەكگرتوەكان رایگەیاند، دەبێت هەڵبژاردنی پەرلەمانی كوردستان ببێتە مایەی قوڵكردنەوەی دیموكراسی و سەقامگیریی سیاسی و كۆمەڵایەتی بەدوای خۆیدا بهێنێت. دەشڵێت، "لە گفتوگۆكانمان بۆ چارەسەركردنی تەواوی كێشەكان لەگەڵ بەغدا لەسەر هێڵین و دەمانەوێت ژیان و گوزەرانی خەڵك لە هەمو ململانێكان بپارێزین."
ئاوێنە: نوسینگەی راگەیاندنی سەرۆكی یەكێتی، ئەمڕۆ دوشەممە، لە راگەیەندراوێكدا وتی، بافڵ تاڵەبانی لە بەغدا پێشوازی لە جینین پلاسخارت، نێردەی تایبەتی سکرتێری گشتیی نەتەوەیەکگرتوەکان لە عیراق کرد.
بەپێی راگەیەندراوەكە لە كۆبونەوەكەدا "دۆخی سیاسی، پرسی هەڵبژاردن و چارەسەركردنی كێشەی موچەخۆرانی هەرێمی كوردستان گفتوگۆی لەبارەوەكرا و جەخت لە بەردەوامیی گفتوگۆی بەرپرسیارانە كرایەوە بۆ زاڵبون بەسەر ئاڵنگارییەكان و دەستەبەركردنی ژیانێكی شایستەتر بۆ خەڵك."
وەك لە راگەیەندراوەكەدا هاتوە، بافڵ تاڵەبانی ئاماژەی بە "هەوڵەكانی یەكێتی كرد بۆ تێپەڕاندنی ئەم دۆخەو بەڕێوەچونی هەڵبژاردنێكی بێگەرد كە گوزارشت لە واقیعی هەرێمی كوردستان بكات." وتیشی، "دەبێت هەڵبژاردن ببێتە مایەی قوڵكردنەوەی دیموكراسی و سەقامگیریی سیاسی و كۆمەڵایەتی بەدوای خۆیدا بهێنێت."
لە بەشێكیتری قسەكانیدا بافڵ تاڵەبانی رایگەیاند، "خەباتی یەكێتی لەپێناو بونیادنانی داهاتویەكی گەشترە بۆ خەڵكە خۆشەویستەكەمان، لەو چوارچێوەیەشدا لە گفتوگۆكانمان بۆ چارەسەركردنی تەواوی كێشەكان لەگەڵ بەغدا لەسەر هێڵین و دەمانەوێت ژیان و گوزەرانی خەڵك لە هەمو ململانێكان بپارێزین."